【青春嘅秘密?】39歲周勵淇睇古書學保養 《再創世紀》演少女零違和!

圖︰Niki最近參演《再創世紀》,仲要演埋少女!(影片截圖)

39歲周勵淇(Niki)於無綫劇集《再創世紀》要演少女,但睇起上嚟依然零違和;睇佢跳開場舞個樣,就好似當年佢喺沙灘跳吓跳吓,唱住《要風得風》咁Young!究竟Niki青春嘅秘密係咩?要點keep先可以保持少女樣?最近Niki受訪時,就分享咗佢嘅養生之道。

睇《黃帝內經》 自己煲湯煮飯食

個個都話「中女飲暖水」,唔通個個都可以飲完暖水變少女咩!Niki除咗戒飲凍嘢多年,仲做咗好多嘢先keep住年輕。「我有睇《黃帝內經》研究養生食療㗎!鍾意煲湯,會帶埋出街飲,例如煲土茯苓、扁豆衣,又會煲去濕茶。我喺內地拍戲時,每日都會自己煲湯煮飯食,所以我練得一手好廚藝㗎!」Niki話,自己每朝早餐一定要食飯或粥,要有血氣;而午餐就可以食正常嘢,夜晚7點後就戒食澱粉質。

另外,Niki會恆常做運動,令身形線條再firm啲。Niki話︰「我日日都會拉筋,得閒就會去行山、跑步同埋做gym,一星期做兩、三次。」至於要由內到外保持年輕,Niki認為,保持心情開朗好重要。「我個人好樂天,做人要keep住有童真,諗嘢簡單啲。」又會用天然無添加嘅產品護膚。

演少女係「掹車邊」? Niki剪齊蔭令外貌更年輕

Niki仲話,覺得自己演少女已經係「掹車邊」,「再遲啲都演唔到!我仲特登剪咗齊蔭令自己個樣細個啲。」要講keep住靚樣呢,Niki強調要注意飲食同生活習慣,保持心情好。其實Niki本身都好鍾意食嘢,但佢話︰「不過咁啱係鍾意食啲健康嘅嘢,例如山藥、蘿蔔、淮山、蒟蒻同醋;唔鍾意食油膩嘢,糖、雪糕同西式甜品呢類嘢。」佢又話,近年多在內地工作,開始鍾意食辣嘢,但就話唔可以食太多!

識得睇《黃帝內經》養生,又識得自己煲湯、煮健康嘢食;加埋運動同保持好心情,難怪Niki可以keep住年輕。不過對於日日趕返工、連瞓都唔夠時間嘅人嚟講,Niki嘅良方應該係「絕望真相」;只能講句,盡做啦!

圖︰Niki在第1集嘅開場舞,跳得好有動感㗎!(影片截圖)
圖︰係咪都keep到拍《要風得風》MV時嘅年輕感覺呢?(YouTube截圖)
圖︰為咗keep住年輕,Niki一直都有做運動練肌肉㗎!(ig圖片)
分享: