【孖龔嘉欣探班】余德丞捧蛋糕驚喜現身 江美儀︰有個仔真好!

圖︰余德丞同龔嘉欣驚喜現身,為江美儀慶生。(ig圖片)

今日(20日)係江美儀47歲生日,昨日(19日)余德丞就驚喜現身,捧住蛋糕同《誇世代》一劇飾演佢媽咪嘅江美儀慶祝生日!江美儀之後在ig留言話︰「生日的驚喜,就是我個仔突然嚟探我班,重(仲)買咗個蛋糕同我慶祝生日。我最窩心的生日禮物,就是他健健康康站在我面前。多謝你呀德丞,多謝你阿六(龔嘉欣)同監制(製)Joe(陳維冠)!」有男神現身為佢慶生,江美儀當然開心啦!

張繼聰留言︰Happy birthday!

除咗余德丞,同佢哋一齊演《誇世代》,在劇中飾演「阿六」嘅龔嘉欣,都有以好Rock嘅造型現身。原來龔嘉欣近日為TVB新劇《殺手》,一改以往清純形象,為新劇染頭、剷青、貼紋身;監製陳維冠都有一齊為江美儀慶祝!同樣有份演《誇世代》嘅張繼聰,見到帖文都有即時留言,同江美儀講︰「Happy birthday!」

講返余德丞,佢自從傷癒出院後,開始回電視城返工。日前,佢仲係電視城巧遇Do姐(鄭裕玲),仲好開心一齊合照!相信大家都希望余德丞健健康康,再於幕前見多啲佢嘅!

圖︰江美儀仲hashtag話︰「有個乖仔同我慶祝生日」同「有個仔真好」。(ig圖片)
圖︰佢哋都有參與《跨世代》一劇㗎!(ig圖片)
圖︰日前余德丞在電視城巧遇Do姐,仲好開心地一齊合照。(ig截圖)
分享: