【山竹之後】唔准員工冒險回公司 杜汶澤︰返工即炒!

圖︰杜汶澤早於昨日(16日)已宣布可讓員工在家工作。(fb截圖)

當大家問緊政府點解唔停工,而同時逼住港鐵等返工時,杜汶澤早於昨日(16日)宣布可讓員工在家工作!今日(17日)仲忍唔住於facebook發文話︰「你估條街垃圾多啲定係香港政府垃圾啲呢?無車搭點返工呀?宣布今日放假有幾難呀?」又hashtag話「因為決定嘅人自己有車有司機」;見到大圍站混亂情景,阿澤更加再發文表示,「我決定今日公司所有人唔準返工!返工即炒!講完!」

莊端兒︰老闆英明、果斷、好靚仔

作為員工嘅莊端兒都有留言大讚阿澤︰「老闆英明、果斷仲好靚仔添!」而隨後,阿澤再貼出大圍站今早的相片,大鬧特首未有提出停工,「我好想講,可能林鄭係公務員出身,一個成功嘅公務員,想成功,最重要係按本子辦事!例如:香港法律規定八號風球或以上停工,咁家陣三號吖嘛!照返規舉,咪要返工囉!實無錯啦!至於今日民怨沸騰,哈!好笑嘞!一個成功嘅公務員,最重要係上師滿意吖嘛!民怨?」

阿澤續指,「至於所謂僱主僱員自行決定上唔上班,就更加係成世人無做過半亳子生意嘅諗法!因為如果全城一齊唔使返工,咁就大家都無得做嘢,咁就唔存在不公平,無競爭可言。但係如果大家自行決定,咁對家開,唔通我唔開呀?咁咪好蝕桌?點會有老細肯呀?(雖然我肯。)」阿澤認為︰「佢呢次嘅選擇,不但普羅市民受苦,連好多半山友都話,塞咗一個鐘都落唔到山腳,谷氣決定返屋企!連大粒佬都咁慘,咁打工仔,又可以點?」

而莊端兒亦有在留言和應老闆指,「佢(林鄭)唔肯宣佈停工,咁多人返工,增加所有公共機構前線人員工作量,減慢香港回復正常嘅時間。」

圖︰莊端兒(右一)留言大讚杜汶澤︰「老闆英明、果斷仲好靚仔添!」(fb圖片)
分享: