【延禧攻略】劇迷眼中兩大最討厭角色 爾晴、純妃談被罵感受

圖︰要數《延禧攻略》劇中最令人討厭嘅角色,爾晴(蘇青 飾)、純妃(王媛可 飾)相信都名列三甲之內!(官方圖片)

清宮劇《延禧攻略》正式紅到香港!隨住劇情發展,劇中奸角出招愈來愈心狠手辣,惹來觀眾反感;而要數劇中最令人討厭嘅角色,爾晴(蘇青 飾)、純妃(王媛可 飾)相信都名列三甲之內!呢個反感仲延伸到日常生活,而蘇青同王媛可對於被罵,就有以下嘅諗法。

蘇青︰被劇評家媽媽指出問題

《延禧攻略》中嘅爾晴,先使計搶走魏瓔珞嘅戀人傅恆,同傅恆結婚後更紅杏出牆,色誘皇帝又加害富察皇后,真係一個好惡毒嘅角色。蘇青近日接受媒體訪問表示,「不僅網友會批評我,我媽媽也是一個劇評家,一場我和傅恆的對手戲,她就指出我該進步的地方。」

不過,蘇青就話,自己喺現實生活中最討厭做小三,唔會同人搶男朋友;只要知道對方對自己無意,就一定會放棄!蘇青更加話,「我自己追劇也特別討厭爾晴,天天想她快點領盒飯(死去)。」雖然爾晴呢個角色唔討好,但演奸角特別容易令人睇得見,令蘇青受到多個片方青睞。

蘇青又話,有時街上有人認到佢,都會向佢釋出善意。蘇青舉例:「那天我坐高鐵,休息吃東西時被路人發現,不但沒人罵我,他們還很熱情要求合影,好高興。」

王媛可︰沒關係,我心態很好不怕罵

至於在《延禧攻略》飾演純妃嘅王媛可,劇情初段都係一個溫婉善良嘅娘娘;點知後來黑化,變咗心狠手辣嘅殺人兇手,搞到入戲嘅網民留言就佢早啲死,唔想純妃害到魏瓔珞(吳謹言 飾)!王媛可就話︰「沒關係,我心態很好不怕罵,而且我也不是第一次演反派,轉換一種方式,我演純妃還可以豐富這角色。」

純妃對富察傅恆一往情深,點知癡心錯付,最後因而殘害宮中嬪妃,引來網民憎恨;但現實中嘅王媛可就唔會輕易單戀人。咁王媛可接演純妃,有冇特別搵其他劇作攞靈感?王媛可就話冇,只係憑多年嘅演戲經驗去揣摩角色,王媛可話:「我是女性,女性友人也多,女人對愛情的患得患失,深有體會。」

圖︰蘇青早前在微博貼上一幅惡搞圖,留言話︰「看到大家對爾晴意見非常大,特地抓了兩隻,讓大家泄憤。」(微博圖片)
圖︰王媛可同演皇后嘅秦嵐,私下係好朋友。(微博圖片)
圖︰王媛可近日又貼出佢同秦嵐的合照,留言話︰「純妃燒死七阿哥都是劇本惹的禍,秦嵐你依舊是我的白月光,我先和吳謹言商量下盒飯的歸屬問題就來哈。」(微博圖片) ​​​​
分享: