【乾隆鬥演技】都係演皇帝!《如懿傳》霍建華不敵《延禧攻略》聶遠?

圖︰聶遠(左)同霍建華(右)分別於《延禧攻略》同《如懿傳》中飾演男主角乾隆皇帝。(影片截圖)

先後啟播嘅清宮劇《延禧攻略》同《如懿傳》,故事背景相似,劇中人物亦有不少重疊,難免令觀眾有所比較。其中,於《如懿傳》飾演乾隆皇帝嘅霍建華,日前疑因招架不住網民嘅攻擊,宣布關閉微博同Facebook頁面;在《延禧攻略》飾演同一角色嘅聶遠,卻被網民大讚而深受觀眾愛戴。點解演同一個角色,觀眾反應都有咁大嘅差異?相信演技就係關鍵喇!

霍建華經常忘詞 聶遠教其他演員演戲

霍建華於《如懿傳》演嘅皇帝,雖然被評為「史上最帥乾隆」,但演技上的確未能得到網友肯定。演台灣偶像劇出身嘅霍建華,在演《如懿傳》時經常忘詞,劇中飾演御前侍衛淩雲徹嘅經超仲爆料話︰「是場哭戲,哭得真的嘩嘩的眼淚往下流。但哭到一半,他(霍建華)突然卡詞了,但他不想把這個情緒浪費掉,他就一邊哭也不說詞,從靴子裡拿出一張紙,看一下詞之後再塞回去,繼續哭著演,當時我跟迅姐就笑得不行。」

至於曾被媒體冠以「中國新四小生」嘅聶遠,曾經演活好多個古裝角色,仲好有觀眾緣,再演古裝自然駕輕就熟。而在《延禧攻略》花絮片中,可見聶遠不時都會教其他演員演戲,佢唔單止教瓔珞點樣勾引自己,仲連小太監嘅戲都會教,例如會親自上陣,教小太監要點樣跪;再艱深嘅台詞難唔到佢之餘,仲有空間同其他演員對戲,難怪佢喺《延禧攻略》入面嘅演技,同埋與對手之間嘅對戲,令觀眾睇得咁入迷啦!

加上聶遠識得按場景調整姿態,例如︰面見大臣時會身姿挺拔,以展現皇上威嚴同霸氣。同妃子相處時,就會放鬆落嚟;騎馬、練武甚至是行路,都有帝王應有嘅氣魄。但霍建華於整部戲嘅姿態展現都唔夠細膩,尤其係坐嘅時候,真係少咗皇帝嘅氣勢;原來霍建華受過嚴重腰傷,令佢好難坐得直;但演員要分高下,呢啲細節足以定輸贏。

圖︰霍建華於《如懿傳》的演出,未有處理角色的細節,包括姿態、身段。(影片截圖)
圖︰聶遠演《延禧攻略》連角色的細節也有顧及,仲會教埋其他演員入戲。(影片截圖)
圖︰聶遠演慣古裝劇,真係飲啖茶都散發住皇帝嘅氣派。(影片截圖)
分享: