【都市閒情】傳10月變革轉型 一齊回顧節目嘅經典場面!

圖︰TVB長壽節目《都市閒情》,陪伴香港人26年;最近盛傳節目將於10月改版、甚至改名!(影片截圖)

TVB長壽節目《都市閒情》,陪伴香港人26年;最近盛傳節目將於10月改版、甚至改名!據悉,一眾主持已經知道節目有變動,但未知最後決定。講起《都市閒情》,有咩經典人和事值得回顧?

安德尊大戰李錦聯

安德尊自1995年轉投TVB至今,一直都擔任《都市閒情》嘅節目主持;當中,佢同李錦聯主持嘅《今晚食乜餸》就最深入民心,不過佢哋出名唔係合作無間,反而係出名「互串」、「互窒」;到09年佢哋仲煮餸煮到批踭!最後當然係畀高層「照肺」,仲要佢哋「解體」,無得一齊煮餸。

2015年,二人再次於《都市閒情》重逢,不過火藥味始終如一,安德尊爆李錦聯割雙眼皮,又話佢心胸唔夠闊,李錦聯還擊話:「佢成日俾鑊我跣。」而安德尊再窒李錦聯話:「鑊係孭,唔係跣!師傅係國際名廚,不過唔知靠唔靠得住。」而安德尊除咗出口,仲成日搵機會攞起鑊鏟,喺李錦聯炒緊餸時,爭住用鑊鏟炒餸,「無敵鴛鴦鏟」成功引來網民熱論,成為正正經經嘅「今晚食乜餸」環節嘅亮點。

都市閒情女神彭慧中

2010年參加香港小姐競選入行嘅彭慧中(Phoebe),於15年加入《都市閒情》做主持,係節目入面相對年輕嘅女主。2016年頭,佢開始在節目中展示美腿而畀觀眾留意,仲令佢人氣急升,畀網民封為「宅男女神」呀!其實Phoebe當年參選港姐已經係大熱人選,可惜她大熱倒灶,畀陳庭欣、張秀文和莊思明贏得冠亞季軍。

雖然未能在港姐競選獲得獎項,但Phoebe可以簽約TVB,仲好快可以主持綜藝節目,可謂比同港姐仲多機會發揮。其實Phoebe都有透露過主持《都市閒情》嘅工作非常穩定,同OL返朝九晚五差唔多,所以都想試吓拍劇,挑戰一啲搞笑角色。唔知今次《都市閒情》轉型,Phoebe會唔會有更多發揮嘅機會呢?

甩骨舞加霸氣唱腔 阿舜演繹《娃娃愛天下》

「沒有他,很想去捕捉他!摘了他,哪管他種在誰的家!」2014年,《都巿閒情》設有「鬥戲連唱鬥一番」環節,其中一位參加者黃宏舜(阿舜),以甩骨舞加霸氣唱腔甩骨舞加霸氣唱腔,演繹林曉培原唱嘅《娃娃愛天下》。

結果引來觀眾爆笑之外,仲畀評判江華寸爆!江華先問︰「你想我講真話定講假話?」阿舜回應︰「你鍾意啦!」搞到江華話︰「你叫我點答你呢?我鍾意…… 其實我知道你呢,對自己好有信心,問題就係邊度?你知唔知呀?」阿舜搖晒頭話︰「唔知呀。」江華即爆︰「你咪就係對自己太有信心囉!」阿舜變一變樣,就dead air咗。

江華繼續講,「我知道呢,你跳舞應該幾得嘅,但頭先你嘅表演呢,可能係你平時嘅4、5成度嘅,你發揮唔到出嚟。」到2015年,阿舜再次復出,雖然身型脹爆咗,但自信依然!事隔多年,阿舜已經結咗婚;當記者重提江華當年對佢嘅評語,阿舜就坦言有少少唔開心。

圖︰李錦聯同安德尊經常在節目中「互窒」,仲發生過肢體碰撞。(影片截圖)
圖︰彭慧中不時在節目中騷美腿。(影片截圖)
圖︰網民仲封彭慧中做「都市閒情女神」。(影片截圖)
圖︰江華話阿舜表演太有自信,令阿舜有少少唔開心。(影片截圖)
圖︰「娃娃舜」嘅甩骨舞,成功引起網民關注。(影片截圖)
分享: