【全民造星】辭正職、女友提分手 20強參賽者保錡面臨「三失」

圖︰《全民造星》參賽者保錡無緣入10強,加上辭去正職參賽,女友又提分手,令他頓時面臨「三失」。(fb圖片)

ViuTV《全民造星》即將進入10強之爭,參賽者更要到美國集訓。而20強參賽者、現年27歲嘅保錡,為參加比賽辭去網頁剪接師嘅正職,迎接訓練、綵排、錄影;連與他拍拖幾年的女朋友,也在20強淘汰賽前一日向保錡提出分手;最後,保錡被Out出局,令他頓時面臨「三失」。

保錡多次缺席綵排 花姐發言時爆喊

保錡之前曾被取笑為「少年八兩金」,令他情緒忐忑及失眠。在《全民造星》節目中,保錡多次缺席綵排,搞到花姐(黃慧君)又要現身,同一班A組學員做心理輔導︰「你哋參加咗幾個月比賽,相信你哋犧牲咗好多,可能冇時間搵錢,可能冇機會陪到女朋友啦!好似我咁,花咗好多時間喺呢個節目,冇時間陪屋企人,或者喺咁多年你哋所謂尋夢,犧牲咗好多側邊嘅人,同佢哋相處嘅時間。」

此時,保錡突然爆喊,更指︰「佢(女朋友)可能唔明訓練幾密集式同有幾辛苦,可能佢覺得我陪佢唔係好夠。有夢想嘅人預咗要付出㗎啦,外人係唔會明白你有幾努力,佢只會睇到你嗰一刻能夠做到幾嘢囉……我對唔住而家一齊緊個女朋友,佢都唔會體諒我,我有幾想做呢件事。」原來錄節目時,保錡當時的女友仍未提出分手;至20強淘汰賽前一日,保錡終接到噩耗,在翌日更要面對另一大打擊︰出局。

30強入20強 「只係休息咗一日」

保錡日前接受媒體訪問,直認無緣晉身10強;對於為一個比賽而失掉工作、女友,如今又失落10強,保錡仍覺值得。「畢竟喺你記憶做咗件你唔會後悔嘅事。」保錡續指︰「我努力咗表演,就算我入咗10強,我知我自己冇可能贏到。我想努力做一件事,想證明吓自己可唔可以做到自己想做嘅嘢。」

談到女友分手一事,保錡指︰「佢(前女友8月)16號生日,首先我金錢上afford唔到送啲乜嘢畀佢,我又冇乜時間準備到啲乜嘢surprise畀佢,因為我真係好攰好攰。」保錡憶述,《全民造星》30強入20強時,只係休息咗一日,就要開始排另外一個舞,「可能(女友)有hard feeling,畢竟可能係幾個月累積出嚟。」至8月18日二人就分手收場。

保錡又話,錄呢個比賽用咗好多時間,大家睇到30分鐘嘅節目,係3個月來連連不斷練習時拍下的,他自言︰「我都係普通香港人,都要打工嘅,我玩呢個比賽就辭咗份工,夜晚可能要做part time……」而近日保錡在facebook仍然有分享《全民造星》的相片,更留言指︰「感恩在路上遇上不同的人,珍惜每個伙伴,珍惜每個時刻。」

圖︰保錡(左一)於節目中突然爆喊。(ViuTV截圖)
圖︰真係喊得好淒涼。(ViuTV)
圖︰保錡分享A3組與花姐(右一)的合照,並留言︰「開心決定參加全民造星,做好多野都會有得有失﹐最重要無悔,
努力走得更遠、做得更好。」(fb圖片)
分享: