【39.6度高燒】陳柏宇︰好野!有得高! 辛苦老婆大住肚帶佢去醫院

圖︰陳柏宇發高燒,要老婆大住肚陪佢入醫院。(ig圖片)

歌手陳柏宇最近忙於宣傳新歌《認真如初》,呢首歌嘅MV入面,仲有佢太太符曉薇(Leanne)同肚入面嘅囡囡一齊拍攝㗎!唔知係咪因為工作太忙,抵抗力弱咗,陳柏宇昨晚(6日晚)於ig表示自己發緊高燒,仲一度量到39.6度燒呀!雖然陳柏宇本身好幽默咁話︰「好野!有得高!」但最後都要由陀住B嘅太太陪佢入醫院。

Leanne︰大肚婆帶條友仔去醫院

陳柏宇入院後再於ig貼相,留言話︰「頭先係(喺)屋企探熱39.6。而家嚟到醫院探又得返37.8。」Fans見到佢情況穩定返,都叫鬆一口氣,有網民笑言︰「可能驚老婆辛苦,自動退燒」,又有人同佢講「Take care 呀陳伯」;亦有Fans話︰「前日live先叫你要養好聲,你依排太攰啦,身體健康先可以唱歌架(㗎)!」

至於太太Leanne,亦有ig限時動態發文話:「夜晚晚(夜麻麻)燒到差不多四十度,大肚婆帶條友仔去醫院。」抱怨中亦帶着一絲絲的甜。

圖︰陳柏宇本來仲好幽默咁話自己發高燒、有得高。(ig圖片)
圖︰陳柏宇最近忙於派新歌,而新歌MV仲有大住肚嘅太太Leanne參演。(影片截圖)
圖︰仲有好sweet嘅咀嘴畫面。(影片截圖)
分享: