【痴情漢來襲?】企大宅閘口指天篤地 何超蓮︰我諗佢冇惡意

圖︰何超蓮居住嘅布力徑大宅,近日有一名男子在閘外守候,仲預備咗不同禮物送畀超蓮。(ig圖片)

賭王何鴻燊三房千金何超蓮,被警察群組爆料﹐話近日有一個「公安」喺超蓮屋企被捕;群組對話更表示,呢位「公安」對超蓮非常傾慕,仲想追超蓮!而超蓮接受媒體訪問,證實有一名男子到佢屋企門外送禮物,保安見到佢行為有異,就打電話報警。超蓮又話,覺得男子冇惡意,所以冇打算再加強保安。

成日送禮物 送信、送花連琴仔都有!

超蓮指,該名男子在其寓所外守候已有一段時間,但未知對方身分。超蓮話︰「佢喺度好多日啦,成日都等我,我哋啲保安都好熟佢,唔會畀佢入嚟我屋企。嗰日我阿媽出車,佢入咗嚟(入咗大宅閘內),佢哋覺得要報警,所以就報咗警。」

而超蓮就話,該名男子送過好多禮物畀佢,「信啦、花啦,又有公仔。助手叫佢Piano,好似送過部琴仔,收佢好多禮物,又熊仔……」但超蓮認為,相信該男子並無惡意,因此冇打算加強大宅保安。超蓮助手Sandy就話,該名男士年約40多歲,當時企咗喺閘口半日,自言自語、指天篤地,保安見到佢行為有異,就報警處理。

【即睇超蓮靚相!】

圖︰何超蓮有唔少Fans,最近佢喺銅鑼灣開麵鋪,都有唔少粉絲專程去捧場!(ig圖片)
圖︰超蓮原來都會食麥記,圖為佢喺凌晨4點現身麥記食嘢嘅開心樣!留意返,3個包加一盒雞塊,應該唔係自己一個食嘅。(ig圖片)
圖︰超蓮仲鍾意滑水㗎!(ig圖片)
圖︰女神在煩惱甚麼?(ig圖片)
圖︰超蓮與愛貓。(ig圖片)
分享: