【亞姐2018】10名入圍佳麗見傳媒 選美常客逐個捉!

圖︰2018亞姐候選佳麗(左起)2號梁雪瑤、3號張靜茵及9號李芷菱,都曾經參加過香港小姐面試。(亞姐官網圖片)

亞洲小姐競選歷年來停辦過兩次,自2015年起第二次停辦,到今年終於復辦,並於今日(6日)舉行「2018亞洲小姐香港賽區競選」記者會,介紹10位入圍佳麗。不過今屆入選嘅亞姐佳麗,當中一半都參加過選美,其中4位仲參加過TVB嘅香港小姐競選㗎!即刻睇吓邊個「選美常客」入圍先!

梁雪瑤

2018亞姐候選佳麗2號梁雪瑤,去年參加過香港小姐選舉,可惜在複賽已止步,未能入圍。梁雪瑤當年受訪時表示,自小就夢想成為香港小姐;未能入選嘅佢,仲話先返澳洲修讀建築碩士,下屆再參選過!結果今年就成為入圍亞姐。

梁雪瑤又曾經表示,自己視2013年港姐冠軍陳凱琳為目標,因為覺得佢夠nice之餘,亦搵到個好歸宿。

李芷菱

2018亞姐9號李芷菱,有兩次選美經驗,2017年參加過「中國小姐」大賽,今年都有參加香港小姐面試。雖然兩次比賽都未能入圍,但李芷菱繼續屢敗屢戰,參加2018亞姐,最後入圍成為10名候選佳麗之一。

李芷菱話,自己由細到大都鍾意演戲,希望透過呢個渠道完成夢想;又希望突破自己成為一個演員。佢又話︰「青春好寶貴,要把握青春去選美,參加得選美都有自信。」

張靜茵

至於2018亞姐3號張靜茵更加係「選美常客」,佢參加過2016港姐同「ViuTV廣告女神」競選,加埋今次入圍亞姐,就香港3個電視台嘅選美活動都參加過喇!

張靜茵於參加「ViuTV廣告女神」時曾表示,自己鍾意幕前,仲話就算失敗咗都會繼續努力;今次入圍亞姐10強,都選係有進步呀!根據大會資料,25歲嘅張靜茵大學畢業,更加係投資銀行分析員嚟㗎!

至於5號蘇頌筠今年都有參加過港姐面試,佢當時仲話:「冇話特別想參加邊個選美,純粹想畀自己有新挑戰同突破。」

分享: