【有潛規則?】落選港姐翟秋平再選亞姐 FB發文宣布「被退出」

圖︰翟秋平選完港姐、選亞姐,點知昨日(5日)於facebook公佈自己「被退出」的消息。(fb圖片)

2018亞洲小姐香港賽區競選,候選佳麗今日(6日)會首次見傳媒。不過,其中一位上完兩個星期特訓卻「被退出」嘅佳麗,昨日(5日)就慘到要喺facebook出Po自我安慰!講緊嘅就係前排先參選完港姐,但入唔到決賽嘅翟秋平;佢仲喺帖文表示,自己係「被退出」㗎,仲話︰「看清了這家機構(亞洲電視)、這個『競選』的面目和『潛規則』。」

保母通知「被退出」 有感不被尊重

翟秋平接受媒體訪問表示,「被退出」前一日收到保母通知,同我哋講有評核,所以要見高層;點知見完高層當晚9點幾,就收到保母電話,話收到公司通知,佢要退出亞姐比賽。翟秋平講到喊,又話︰「保母都同我講︰『諗咗好耐打唔打畀你,因為你係最乖、最準時、最守規矩嗰個。』」並指「被退出」一事「係高層決定,我(保母)都係奉命行事」,並無交代點解要佢退選。

由於「被退出」一事,係由保母代為傳話,事前事後都冇亞視高層當面解釋點解要佢退出,令翟秋平有感不被尊重。佢受訪時更指︰「其實當日(被退選當日)我全日都喺公司特訓,咁多位高層,搵一個同我傾5分鐘都得啩?點解連基本尊重都唔俾參賽者,而係搵一位保母,其實即係一個姐姐嚟同我講?真係令我好失望同唔開心!」

翟秋平覺得不被尊重,據知評核會面高層當中包括前無綫高層何麗全,但最後通知佢「被退出」嘅只係保母,佢話﹕「其實當日我全日都係公司特訓,咁多位高層,搵一個同我傾五分鐘都得啩,點解連基本尊重都唔俾參賽者,而係搵一位保母,其實即係一個姐姐嚟同我講,真係令我好失望同唔開心!」

圖︰25歲的翟秋平,昨日(5日)在facebook發文宣布「被退出」亞姐選舉。(fb截圖)
圖︰翟秋平不時在facebook發文,字裡行間流露出自己正面對失意事,但又要為自己打氣咁樣。(fb截圖)
圖︰翟秋平不時為活動擔任司儀,更開埋facebook專頁分享工作點滴。(fb截圖)
圖︰翟秋平今年初仲祝自己︰「人見人愛、車見車載、花見花開」。(fb圖片)
分享: