【珠光寶氣】82集台慶劇拍攝一年 劇中竟有4位演員遭遇不幸?

圖︰TVB長劇《珠光寶氣》拍攝時間長達1年,期間更有4位演員遭遇不幸經歷。(網上截圖)

現正於TVB深夜時段重播嘅82集長劇《珠光寶氣》,係TVB 41周年台慶嘅重頭劇;演員及製作團隊更遠赴青島、西藏、澳門、泰國、法國和印尼取景,並獲珠寶商提供近5000萬港元鑽飾作拍攝之用。此劇拍攝時間長達一年,期間更有4位演員在現實生活中遭遇不幸!

黎姿︰弟弟遇嚴重車禍

拍攝《珠光寶氣》期間經歷最嚴重不幸事件的,應是劇中女主角之一的黎姿。黎姿弟弟黎嬰,當年遇上嚴重車禍,曾一度昏迷3個月;黎姿為照顧弟弟需要離開劇組,因此劇中在青島拍攝的戲份,唔少都要出動替身去拍。至08年,黎姿更棄影從商,撐起成個家,設法醫好黎嬰。

黎嬰未遇車禍之前係皮膚科醫生,可謂年輕有為;佢遇上車禍昏迷,更差啲變成植物人!黎姿10多年來不惜傾盡家財為細佬求醫;據悉,黎嬰如今雖然要坐輪椅,但已經好返8、9成!黎姿於2017年更豪擲$4,400萬,於自己住緊嘅中半山屋苑,購入多一個逾千呎單位,畀黎嬰同父母住。

林保怡︰經歷喪母之痛

林保怡在拍攝《珠光寶氣》時,其母身體已經轉差,更因消化系統受破壞,要插鼻喉灌營養。出名孝順嘅林保怡當然好心痛,雖然忙於拍劇,但都會抽時間買輪椅、呼吸機,希望令媽咪冇咁辛苦。去法國拍一個月外景前,林保怡同媽咪講︰「媽媽,我去拍劇一個月,你要等我返呀,知唔知?」

到佢一個月後返到香港,林媽媽情況已經很壞。當林保怡趕到醫院,佢見住媽媽嘅心跳機慢慢出現直線,佢錫咗媽媽額頭一啖,同佢講「一路好走」;之後佢就打電話返TVB請假,第2日自己一個安排媽咪嘅後事,第3日就照常開工!懷住喪母之痛,仲要拍好開心嘅戲;林保怡好專業咁完成拍攝,收工又再安排林媽媽嘅後事。

蔡少芬︰嗌到失聲 要全身麻醉割血泡

至於另一女主角蔡少芬,大家煲劇時都會睇到佢劇中嘅爆發戲;嗌到聲嘶力竭嘅佢,最後因此而失聲,仲要入院做全身麻醉手術割血泡!當時蔡少芬經理人亦有證實事件,話蔡少芬失聲咗好耐,因拍《珠光寶氣》時要好很激動咁嗌,之後就失咗聲;醫生仲話佢因聲帶損傷,又冇適當休息而形成血泡。

當年蔡少芬要全身麻醉做手術,醫生仲要佢休息2星期,期間唔可以講嘢,之後先可以出院;所以蔡少芬就因此而要向劇組請假喇!

楊明︰醉酒鬧事 被禁離港

楊明(前藝名揚明)當年拍攝《珠光寶氣》期間,曾因涉嫌醉酒鬧事,在候審期間被禁出境。上文都提到,《珠光寶氣》一劇包括好多外景拍攝部分,楊明被捕後獲准以1萬元保釋候審,佢被法庭禁止佢離港,雖然佢再向法庭申請更改擔保條件,但最終法庭只批准他一段時間離港,唔多唔少都影響到佢要拍嘅外景戲份。

楊明當年不時惹上官非,成為警署同法庭嘅常客。佢於拍劇期間因飲醉酒,而在便利店錯將回鄉卡當八達通畀錢,仲因為畀唔到錢而打爛店內的八達通機!由於佢當年出庭時否認控罪,案件仲要押後再審呀!亦都係4位出事演員之中,最唔抵爭嘅一個。

圖︰黎姿弟弟在她拍劇期間不幸因交通意外受重傷,黎姿先請假照顧弟弟,到08年更棄影從商,撐起成頭家。(影片截圖)
圖︰林保怡拍完法國外景,一返香港就要面對媽媽離世,並且邊拍劇、邊為佢處理後事。(影片截圖)
圖︰蔡少芬在拍劇期間因聲帶有血泡,搞到要入院全身全身麻醉做手術。(影片截圖)
圖︰楊明在拍攝《珠光寶氣》期間,因涉嫌醉酒鬧事,在候審期間被禁出境,影響他拍攝外景的戲份。(影片截圖)
分享: