【最討厭女星】工藤靜香首次攞第一 究竟「三甲」衰啲乜?

圖︰日本雜誌《週刊文春》公布年度「最討厭女星」調查結果,工藤靜香變第一。(ig、網上截圖)

工藤靜香同木村拓哉嘅15歲細女木村光希(Kōki),出道短短幾個月已成「A級身價星二代」,威盡亞洲!不過,Kōki媽咪工藤靜香就繼續被人負評,日前工藤靜香在ig公開自己屋企個「花園系」洗手間,留言話︰「每天也要使用的廁所,裝飾自然充滿樂趣。」網民卻認為「佈置似銀座夜總會嘅洗手間」,同埋「好有中國餐廳嘅土豪味道」。近日有日本雜誌公布年度「最討厭女星」調查結果,工藤靜香更首次攞第一!

被指教唆木村拓哉 令SMAP解散

洗手間佈置唔靚、衣著品味差,都唔至於會令工藤靜香成為「最討厭女星」冠軍;更關鍵嘅一點係佢被指教唆木村拓哉,令1988年成立的日本組合SMAP,最終在2016年解散。呢個「指控」令工藤靜香「形象插水」,即使Kōki出道大受歡迎,都幫唔到佢挽回聲望。

而上屆「最討厭女星」冠軍松居一代,今年就變第二;佢因為向雜誌提供一本寫滿老公船越英一郎秘聞的「恐怖筆記」,加埋事後拍片大爆船越英一郎患糖尿病卻代言健康食品,以及「出軌」偷情,令觀眾非常反感。其實松居一代同船越英一郎被傳感情不和多年,松居一代於2011年曾講過「想殺了他(船越英一郎)」,二人最後於2017年12月松居一代開記者會宣布離婚,仲一直舉起勝利手勢話︰「一定是老天爺在保佑我。我贏了!」,仲話自己嘅心情,好似做完年末大掃除一樣咁爽。

至於名列第三的伊藤綾子,因被傳與日本組合「嵐」成員二宮和也拍拖,而被Fans厭惡。之前有日本媒體影到伊藤綾子坐上二宮和也的私家車,仲有傳二人已經同居,仲見過家長呀!加上伊藤綾子不時在社交平台暗暗分享與二宮和也相同的物品,搞到「宣示主權」咁,又難怪Fans會嬲嬲嘅!

圖︰工藤靜香被指品味差。(ig圖片)
圖︰佢佈置嘅「花園系」洗手間都被負評。(ig圖片)
圖︰連Kōki都幫唔到媽咪挽回聲望。(ig圖片)
分享: