【囡囡已出嫁】大仔長居溫哥華 曾江與現任太太焦姣相伴相依

圖︰曾江2017年拍攝《唐人街探案2》,電影於今年大年初一上映。(《唐人街探案2》劇照、fb圖片)

曾江剛於星期日(9月2日)迎來83歲生日,日前就有媒體影到佢同太太焦姣去九龍城買餸行逛!報道描述曾江比之前肥咗,有個大肚腩;全程由焦姣陪住行街,但就行得比較慢。其實曾江一共經歷三段婚姻,佢1969年同藍娣結婚,二人育有一子,至79年離婚;至80年與鄧拱璧結婚,二人育有一囡,於90年離婚。而現任太太焦姣則與曾江相伴相依24年;不過曾江同仔囡,就似乎少啲見面。

年長性格變 與囡囡關係轉好

據報道,曾江以前係一個霸道嘅人,乜都要話事;但自從同咗焦姣一齊,佢嘅性格就有所改變咗,仲會怕老婆呀!又因為佢以前性格剛烈,同仔囡嘅關係都唔係太好;仔仔現時長居加拿大溫哥華,兩父子好少見面,至於囡囡曾慕雪就係舞台劇演員,曾江同囡囡近年關係轉好,就到時間更會現身欣賞囡囡嘅演出。

囡囡去年(2017年)結婚,曾江都有同阿雪翹住手步入婚禮場地。近年曾江主要拍內地劇集,亦要參演電影,加上囡囡都要忙演出、忙家庭,相聚時間自然減少。如今曾江開始留港「減產」,就有焦姣陪住;家住九龍塘嘅佢哋,成日都會一齊去九龍城買餸,買完嘢就由九龍城行番屋企,過住平淡而快樂嘅半退休生活。

圖︰2015年,曾江憑《竊聽風雲3》獲得「最佳男配角」獎項。(TVB截圖)
圖︰曾江囡囡曾慕雪係舞台劇演員,近年多參演兒童劇,係小朋友口中嘅雪姐姐;今年8月,她參演劇團一路青空的合家歡舞台劇《叮叮聲》。(《叮叮聲》劇照)
分享: