【唔通睇錯?】網民「祝福」黃心穎馬國明分手 岑杏賢畀Like?

圖︰工藤佑采及其支持者最近「進攻」黃心穎ig,有網民留言「祝福」心穎同馬國明分手,岑杏賢竟然現身畀like?(ig圖片)

2018香港小姐競選結果早已塵埃落定,但呢場選美帶嚟嘅「餘波」依然未了!講緊嘅係落選港姐工藤佑采,因為不滿師姐黃心穎受訪時指她「怕辛苦」,在ig發文向心穎開火,更引來工藤佑采支持者「和應」,到心穎ig留言「助攻」。日前心穎於ig上載一幅日落風景相,就被人留言「祝福你同馬國明分手,祝福」;不過最奇怪嘅係,同黃心穎同屆參選港姐嘅岑杏賢,竟然衝出嚟畀Like呀!

網民發現留言「加多腳」 岑杏賢取消讚好

雖然岑杏賢Like完呢個「分手祝福」留言之後有Unlike返,但網民一早已發現呢個Like,而且仲畀一個用工藤佑采相片做頭像嘅用戶cap圖留底!事後,呢位用戶於網上分享cap圖,並留言︰「『祝福你同馬國明分手』留言,岑杏賢Jennifer都按LIKE,好嘢,證明TVB同事都想你地散,你不信可以睇吓,個留言已經有一百多個人讚,你形象插水啦。」

岑杏賢之後接受媒體訪問,解釋真係「錯手」、「唔小心撳咗一啲唔知咩嘅Post」;岑杏賢話,好彩有網民同佢講返呢件事,而佢亦好識做,即刻打畀心穎同佢講唔好意思,而佢自己事後都Unlike番呢個留言。

分享: