【Ellen離世前一天】鼓勵《全民造星》參加者肥仔 「我希望你真係可以入行」

圖︰盧凱彤離世前一晚錄影的《全民造星》於上周五(31日)晚開始播出。(ViuTV截圖)

盧凱彤(Ellen)8月5日離世,她去世前一天為ViuTV《全民造星》擔任評判;節目於上周五(31日)開始播出,片中的Ellen笑容依舊,且真誠地鼓勵參加者。

Ellen激勵參加者 唔好畀人睇死

昨晚(9月2日晚)播出的一集,龍志權的A2組與梁業(肥仔)的B2組進行唱歌及跳舞對決。在唱歌部分,Ellen語重心長向肥仔說︰「我記得你第一句solo唱嘅歌,你第一個音係有fade fade哋嘅,咁可能要喺嗰一方面再加油!因為你係會備受注目㗎。尤其是呢一種比賽裡邊,大家係會想睇死你㗎!所以你更加要努力,喺你做solo嘅時候。」

到跳舞對決,肥仔一組比龍志權一組跳得出色,Ellen畀評語時又指,「我知道A組係好辛苦嘅,亦都應該排咗好耐嘅,但係呢,我唔覺得係跳舞嘅,頭先你哋做嘅嘢,咁所以呢,B組又真係跳得好好,唔係淨係肥仔跳得好㗎,其他人都跳得好好。」

at17入行時 曾畀Fans嗌「豬扒」

Ellen再點評肥仔,「唉,我同林二汶(at17)入行嘅時候,林二汶同你嘅磅數應該差唔多,我哋曾經喺商場唱歌,下面有Fans大嗌:『豬扒!』跟住我哋就話:『多謝!』跟住就繼續唱;我希望,你真係可以入行,做歌手、做明星、跳舞。」滿面大汗的肥仔,亦連忙向Ellen鞠躬說:「多謝!多謝!」

片段中的Ellen化淡妝,嘴唇顯得蒼白,但說話時堅定有力;於看跳舞對決時,Ellen笑得很開心,更曾向司儀表示:「Enjoy呀!Enjoy呀!好開心呀睇到!」

圖︰《全民造星》評判。(ViuTV截圖)
圖︰肥仔獲Ellen鼓勵。(ViuTV截圖)
圖︰Ellen真誠地畀評語,更用at17初出道時的經歷勉勵參加者。(ViuTV截圖)
分享: