【入行24年首次!】田蕊妮以歌手身分做宣傳 《兩口子》談夫妻相處之道

圖︰田蕊妮最近推出新歌《兩口子》,今日(31日)更首次以歌手身分出席《吒咤樂壇》訪問。(ig圖片)

田蕊妮(阿田)出道24年至今,只係出過一隻翻唱碟;而今年年底,阿田終於會推出有自己歌曲嘅CD;今日(31日)佢更加首次以歌手身分,到商台音樂節目宣傳新歌《兩口子》。阿田話,呢首新歌講嘅係夫妻相處之道,而佢同老公杜汶澤(阿澤)結婚13年,早已過咗新婚嘅激情,但阿田話︰ 「佢(阿澤)對我有無限嘅耐性,就算(佢)幾攰,(我)有乜同佢傾都會聽!」

新碟有7首翻唱歌 包括張國榮《側面》

是次新碟有3首新歌、7首首翻唱歌,包括張敬軒、周柏豪,以至張國榮的名曲《側面》。新碟預計年底面世,而咁啱阿田11月要拍劇,但佢話因為係首次出個人專輯(2014年出過翻唱專輯《You Are My Man》),佢會盡量度期做宣傳!

講返佢同阿澤嘅兩口子生活,阿田坦言,已經唔係新婚嘅激情,而係淡淡嘅甜;而佢學到嘅係︰「兩個無血緣嘅人走埋一齊,年期可能長過同父母,相處好講學問,包容係唔夠,要放下自私,從對方角度諗。」而阿澤就曾經形容佢同阿田係「威士忌愛情」,越嗒越有味。

圖︰田蕊妮同杜汶澤結婚13年,二人不時會於ig貼相放閃。(ig圖片)
圖︰杜汶澤同太太田蕊妮結婚13周年,阿澤今年上載阿田的照片,並寫下愛的宣言!(fb、網上圖片)
圖︰杜汶澤於2012年透露自己患上罕見病「米勒費雪症候群」,有機會導致癱瘓,甚至死亡;阿田當時對阿澤不離不棄。(Facebook圖片)
分享: