【再創世紀】內地率先播 有咩劇情亮點值得留意?

圖︰《再創世紀》於內地啟播。(影片截圖)

無綫1999年長劇《創世紀》嘅續集《再創世紀》,終於在內地啟播;呢部劇本身係以香港回歸20周年、TVB 50周年獻禮嘅名義推出,結果因為批文問題要延遲推出。而今次呢套劇集唔只係喺愛奇藝播放,連CCTV-8都可以睇到,劇集於昨日(30日)晚上於內地率先播出,而香港觀眾就要到9月10日先有得睇。

08年金融海嘯做背景 郭晉安誓要做首富

《再創世紀》第1集,先為劇中人物關係做咗簡而精嘅描述,而今次劇情會以07、08年金融海嘯做背景,講郭晉安飾演嘅賀天生,欲借助金融海嘯而吞併劇中胡楓為首嘅集團,而飾演胡楓個囝嘅黃子雄,在劇中係一名「敗家仔」,仲拎咗公司股份做抵押去投資,幸好有林文龍同潘志文幫助下,集團先保得住!而劇情又會講到郭晉安點樣用盡方法,誓要爬上首富之位!

感情線方面,郭晉安同楊怡第1集已經喺教堂入面求婚;至於林文龍就同鍾嘉欣演情侶,不過因為鍾嘉欣父母投資失敗而自殺,搞到佢嘉欣因此怨恨林文龍,最後仲失咗蹤呀!喺第1集出現嘅情侶檔仲有袁偉豪同周麗淇(現名周勵淇),而周麗淇在劇中仲打頭陣,於布拉格街頭表演一場現代舞。

網民︰郭晉安眼神超嚇人

唔少網民睇完第一集,都覺得郭晉安演奸角的眼神超級嚇人,仲有網民cap埋圖出嚟呀!亦有網民話︰「看到鐘嘉欣、林文龍,彷彿《法證》系列時候丁丁和古醫生回來了!」而呢套劇係鐘嘉欣產後復出,同埋正式離開TVB嘅最後一套作品,要再睇到鐘嘉欣同林文龍演情侶,相信都比較難再實現了。

亦有眼利網民發現,內地版字幕將劇中人物嘅英文名譯成︰萊奧、鄧肯、海莉;網民認為,「這個字幕真夠了!」不過亦有網民認為可以理解,「不是所有人都懂英文名字的讀音,翻譯成漢字,便於記住角色。」有網民又指,「tvb播出36集,愛奇藝廣電刪減成了34集」所以「好煩躁」!

大部分網民對於《再創世紀》反應正面,唔知收視方面,有冇機會再創新高呢?

【劇中亮點搶先看!】

圖︰《再創世紀》由周麗淇在布拉格街頭跳舞揭開序幕。(影片截圖)
圖︰就係郭晉安呢個眼神,搞到觀眾好心寒!(影片截圖)
圖︰林文龍同鍾嘉欣再演情侶,唔少網民都睇得好開心。(影片截圖)
圖︰郭晉安同楊怡喺教堂求婚,無錯!情節一啲都唔似傳統求婚,呢啲咪夠霸氣囉!(影片截圖)
圖︰袁偉豪同周麗淇呢一對都幾自然、幾sweet!(影片)
圖︰周柏豪街邊sell手機同充電器,有驚喜!(影片截圖)
圖︰劇中有胡楓坐陣做富商,係袁偉豪劇中嘅爺爺。(影片)
分享: