【可一可再!】仲有Ellen拍好嘅MV未推出 陳奕迅透露︰都係開心嘢

圖︰Eason昨日(30日)於直播介紹新歌《可一可再》後接受傳媒訪問,透露還有一個Ellen有份參演嘅MV未推出。(影片截圖)

陳奕迅(Eason)籌備6年嘅全新廣東大碟《L.O.V.E.》即將於年底面世,昨日(30日)Eason舉辦直播分享新歌《可一可再》以及製作《L.O.V.E.》的歷程,仲揚言要自己「包底」,搵埋一班the duo band嘅成員,喺香港開一場免費音樂會喎!

Eason於直播後接受傳媒訪問,談起於8月5日離世的盧凱彤(Ellen),Eason仲透露,除《可一可再》之外,Ellen亦有參與另一首新歌嘅MV拍攝,至於係點嘅MV?Eason話,「都係開心嘢嚟㗎!」

再演出少咗Ellen Eason︰唔可以搵第二個去替佢

對於Eason and the duo band再次開騷會冇咗Ellen,少咗一位結他手,Eason話,「呢個都係一個問題,佢唔喺度我唔可以搵第二個去替佢,唔通搵林二汶?咁樣對大家都唔公平,但我好慶幸我哋曾經一齊做過呢件事,佢彈嘅聲音永遠都留低喺度,我哋錄起咗,或者到時演唱會上照播我哋跟住彈。」

Eason又透露,Ellen有睇過《可一可再》嘅MV,「拍MV之後,我係有見過阿妹(Ellen)嘅!其實嗰陣係耐冇見過佢,所以我叫咗阿妹同另一位朋友上我office,一齊睇呢個MV,好彩有呢吓咋!當時佢有提出少少意見,好彩有畀佢親眼過目!佢對於MV自己的部分有少少修改,都真係好少,係一啲長短嘅問題。」

Eason指,《可一可再》MV原本於8月頭推出,但因為Ellen,所以延遲公開,佢話:「好似而家個timing啱啲,係…好掛住佢囉……係一啲佢做嘅好嘢嚟嘅,佢都係DUO嘅一份子,我都諗咗好耐,係要出嘅,係應該同大家分享嘅!」Eason仲話,「其實仲有一個MV佢都有份㗎,我哋一早拍好咗,因為想一日拍晒佢。」相信大家都會期待見到Eason嘅新歌、新碟,同埋呢個新MV!

圖︰參與DUO巡演,台上的Ellen(右)與Janet。(YouTube截圖)
圖︰在eason and the duo已推出的歌曲《與你常在》中,亦可找到不少Ellen與其他DUO成員一起互動的點滴。(YouTube截圖)
圖︰連Eason同DUO成員打牌嘅片段都有收錄於《與你常在》MV中!(YouTube截圖)
分享: