【短暫的婚姻】林海峰都參演舞台劇版! 超強陣容分飾4個主要角色

圖︰林海峰(左一)將演參舞台劇《短暫的婚姻》。(fb、網上截圖)

由香港著名劇作家莊梅岩編劇的《短暫的婚姻》,舞台劇版將於2019年1月公演,消息一出,即引起劇迷高度關注!主辦單位連日來公布演員名單,單是潘燦良、禤思敏、楊詩敏(蝦頭)參演,已教觀眾熱切期待,點知今日(30日)公布嘅第4位參與演員,竟然係林海峰(Jan)!

雖然Jan唔係第一次演舞台劇,但同上述3位舞台劇界資深演員演出,的確係第一次;如此強大嘅Cast,的確令劇迷瘋狂。究竟4位演員會飾演咩角色?幾時先知道演出日期、場次等詳情?即刻「劇透」一下先!

潘燦良演Galen 林海峰飾Terry

《短暫的婚姻》一劇,主要有4大角色,舞台劇版嘅Cast將會有以下安排。原本由陳奕迅(Eason)飾演的男主角Galen將由潘燦良飾演,而原本由蔡思韵飾演的女主角Malena則會由禤思敏飾演;至於Malena嘅好友,舞台劇版會由「蝦頭」楊詩敏飾演;而林海峰(Jan)會演Malena嘅丈夫Terry,即係劇集版郭偉亮(Eric Kwok)演嘅角色。

而編劇莊梅岩接受媒體訪問時透露,佢將《短暫的婚姻》嘅劇本交畀舞台劇版監製朱仲銘之前,對於演員選角有咁嘅要求,「我覺得,4個演員入面,有3個做開舞台劇,第4個係可以Draw到飛嘅Artist(可吸引觀眾購票入場的藝人),我係好明白;但呢個Artist都一定要係啱呢個角色,同埋係做過舞台劇。」而Jan正正符合了這個要求。

有搵過Eason演舞台劇版

莊梅岩受訪時又透露,在選角時亦有先詢問Eason會唔會有時間參演舞台劇版,而Eason亦好有興趣參與呢次演出;可惜因為時間上夾唔到,所以冇辦法參演;既然「唔齊腳」未能原班人馬做舞台劇版,莊梅岩就決定重新選角,結果就成為咗今日呢個萬眾期待嘅強勁Cast喇!

雖然各為劇迷已經準備撲飛,但據悉,舞台劇版嘅首演日期、場次數目等詳情,要等到10月10日嘅記者會先可以公布,大家都係繼續乖乖留意住官方facebook嘅最新消息啦!

圖︰舞台版《短暫的婚姻》嘅官方facebook專頁,最近接連發布演員名單。(fb截圖)
圖︰除咗號召力十足嘅林海峰,舞台劇《短暫的婚姻》仲有(左起)潘燦良、禤思敏同「蝦頭」楊詩敏參演。(fb截圖)
圖︰《短暫的婚姻》電視劇版由陳奕迅及蔡思韻主演。(劇照)
分享: