【囡囡考獲11A】梁芷珊自言不勞而獲 才女解構狀元是如何煉成的!

圖︰16歲嘅Eily,同埋朋友仔Andrian,喺公開試都考獲佳績,梁芷珊話,兩位「狀元」都冇畀家人迫過讀書,可以愉快學習。(fb圖片)

才女梁芷珊與前夫商人羅傑承的16歲囡囡Eily,於英國IGCSE放榜喜獲11A佳績,當中包括︰1A**、9A*及1A(Add Maths, 附加數學)。個個家長都望子成龍,究竟一個狀元要如何煉成?梁芷珊呢位「狀元媽咪」竟然拋下一個驚人答案︰「不勞而獲。」梁芷珊解釋,「我以『不勞而獲』形容,係因為我哋完全無push個女,無怪獸家長過。」

「小朋友讀書學習係唔駛迫嘅」

今時今日,唔迫小朋友、唔補習、唔學芭蕾舞、唔學7國語言,可謂「佛系」育兒;不過梁芷珊就以事實證明,時候到了,囡囡Eily自然考到11A做「狀元」。梁芷珊深信,「小朋友讀書學習係唔駛迫既(嘅),開心快樂成長最緊要!」

Eily於14歲到英國升學,在當地讀咗兩年書就要面對GCSE / IGCSE考試,梁芷珊透露︰「學校predict(預計)佢(Eily)有6A*,佢擔心令人失望。」而IGCSE考生最少要考5科先畢到業,而Eily就考咗多過一倍嘅科目數量,更加有10科攞到A*,攞A嘅一科係出名難讀嘅Add Math(附加數學,香港多稱為A. Maths)。

而除咗Eily之外,同囡囡由細玩到大嘅朋友仔Andrian都考到IB 45分,考入港大醫科。梁芷珊話︰「Andrian媽咪係我中學同班同學,佢都係,爸爸媽媽從來無迫過佢,咪又係做狀元!」原來梁芷珊最近都籌備緊一本新書,訪問歷年嘅香港狀元;其實「不勞而獲」都可以出狀元,家長真係唔洗過份緊張嘅!

圖︰囡囡Eily今日(30日)生日,梁芷珊之前為Eily同都係同一日生日嘅周麗淇一齊慶生。(fb圖片)
圖︰梁芷珊笑言,囡囡考獲佳績,係16歲生日前提早送畀佢嘅一份厚禮,獎勵佢16年前辛苦生囡囡出來。(fb圖片)
圖︰唔駛做怪獸家長,就可以同囡囡建立更好嘅關係啦!(fb圖片)
分享: