【個廳超大】陳小春豪宅再曝光 連浴室都充滿驚喜!

圖︰陳小春的千萬豪宅曾經在《爸爸去哪兒5》中曝光,但今次豪宅女主人應釆兒更有如睇樓節目般,公開兒子房間、大廳及浴室的裝潢。(YouTube截圖)

最近播出、由應采兒擔任主持嘅內地真人騷《妻子的浪漫旅行》,又去咗陳小春同應采兒嘅豪宅取景,仲首次公開Jasper房間同浴室嘅裝潢。唔少人都覺得Jasper間房空間超大,而浴室亦充滿驚喜,有水機、有按摩浴缸,Jasper仲可以邊玩鴨仔邊沖涼。

大廳闊落 一件玩具都冇?

唔少有小朋友嘅屋企,家中每個角落都會畀小朋友嘅玩具同用品侵佔,但係陳小春同應采兒嘅屋企,大廳一件玩具都冇,依然咁通明!應采兒就話,佢一直都教Jasper,客廳係大家嘅空間,唔可以隨便將自己嘅玩具放喺度;佢隨即於飯枱攞起一件小玩具,直言︰「我受不了!」

而當應采兒於大廳執行李嘅時候,發現大廳以簡潔擺設為主,除咗梳化同一啲吊櫃,地面唔會擺放太多家具,令大廳嘅空間感再提升。節目中,陳小春都有出鏡,仲被問到好多佢同應采兒相識同相處嘅事;佢哋又好似日常生活咁,睇吓報紙、喺梳化攤吓、玩吓手機。

圖︰陳小春同應采兒示範佢哋日常點生活。(YouTube截圖)
圖︰應釆兒話,Jasper唔可以喺大廳放玩具,因為呢個係大家嘅地方。(YouTube截圖)
圖︰呢個浴室先勁,有埋按摩浴缸,仲有水機。(YouTube截圖)
圖︰個廳大到呢‥‥ 但真係以簡約為主,地面唔會放太多擺設。(YouTube截圖)

Jasper房間超大 玩具原來喺呢度!

應采兒於Jasper房間做節目,畫面見到Jasper房間有唔少玩具,同時亦分為幾個唔同嘅部分。一入門口左手邊係單人床,而窗台就放滿大模型,相信都係Jasper嘅至愛!

窗台旁邊有一大一小嘅小梳化,可以畀Jasper同爸爸、媽媽傾吓計,仲有一set小桌椅畀佢坐吓,而另一面牆就放咗幾個架,放玩具同其他物品,架上面仲有陳小春同應采兒嘅人型公仔,就算爸媽要工幹,Jasper都可以望吓公仔「止渴」。

圖︰應采兒住喺Jasper房間做節目。(YouTube截圖)
圖︰Jasper房間另一角。(YouTube截圖)
圖︰房間有一個位置擺房Jasper嘅生活照。(YouTube截圖)
分享: