【港姐2018】真係Single? 季軍丁子田4月同男友遊希臘

圖︰2018年港姐季軍丁子田於賽後表示自己單身,但今年4月仍見她與男友遊希臘愛琴海,相當甜蜜。(網上截圖)

2018年港姐季軍丁子田(Sara),一直被視為奪軍人選;Sara獲獎後出席《#後生仔傾吓偈》節目,當被主持問及感情狀況時,佢同冠軍陳曉華都話自己係Single(單身),只有亞軍鄧卓殷承認有拍拖。不過,其實Sara都係喺參選前同男友分手,仲話「Long D」好難維繫、想事業再努力啲,因此先忍痛同拍拖五年嘅男友Mark分手!睇返Sara嘅社交平台,原來佢今年4月先同男友去過希臘愛琴海旅行,仲玩得好開心。

享受陽光與海灘 旅行食水煙

Sara今年4月同Mark去咗希臘愛琴海Mykonos小島度假,見到佢哋享受陽光與海灘,又甜蜜「撐枱腳」;玩得興起,Sara更大膽吸食水煙!佢哋又租咗一架開蓬Mini四圍遊,睇落真係唔似即將分手嘅情侶!

其實,Sara嘅來頭好勁㗎!佢畢業於美國名校密歇根大學,之後於紐約任職藥劑顧問;而且Sara多才多藝,4歲已獲鋼琴比賽冠軍,亦係大學排球女將!今次來港參選,Sara由張堅庭擔任其提名人,原來Sara姑媽係無綫甘草演員丁主惠,而Sara嘅另一位姑媽Judy,同無綫高層樂易玲好friend,相信Sara就選Single定拍拖,要喺無綫發展都唔難呀!

圖︰Sara今年4月同男友Mark去愛琴海渡假,仲影咗唔少靚相。(ig圖片)
圖︰Sara擅於彈琴,4歲已經在鋼琴比賽奪冠。(fb圖片)
圖︰Sara當選後指,自己現時Single(單身)。(網上截圖)
分享: