【贍養費係零…】手術後迎53歲生日 羅霖做單親媽媽6年花500萬

圖︰(ig圖片)

羅霖今日(24日)53歲生日,佢日前就同細仔Jonathan,以及一班好朋友慶生。羅霖更於ig分享慶生相,並留言︰「感恩!祈求上帝給我健康和堅強的心面對未來!」

羅霖接受媒體訪問時透露,自己剛因病要入院割瘤,仲因為麻醉藥敏感,而一度成塊面腫晒;佢打咗三支防敏感針同一支腎上腺素,又因為插喉而傷咗喉嚨!談起生日願望,羅霖希望身體健康同少啲壓力,因要獨力撫養3個仔,6年來已花上500多萬,認真吃力!

「如果堅持唔到,想佢爹哋照顧返兩個大仔」

羅霖指:「3日前去律師樓,計一計呢6年幾支出同收入,原來照顧呢3個仔讀書、生活費、租金等,有500幾萬。而家由零開始,如果堅持唔到,想佢爹哋照顧返兩個大仔,太大壓力,但又好愛佢哋!」佢仲透露︰「呢6年嚟,冇一個人相信我贍養費係零,到琴日仲有人問緊我,冇可能冇贍養費,真係零!」

計一計數,羅霖大仔曾於海外讀書3年,花掉150萬,回港再讀理工;而二仔於美國讀書,而家讀緊Year 3,共4年學費,都要100多萬;還有細仔Jonathan也要讀書呢!好彩囝囝都好有媽咪心,「琴日搭正12點,老二喺美國send WhatsApp同通電話;大仔去咗美國旅行,有同我WhatsApp;細仔今年第一次話叫我自己揀禮物,喺佢利是錢度扣,不過好笑,佢利是錢唔係好多。」

對於又大一歲,羅霖覺得,「歲數係一個數字,最緊要身體健康,心境正面,諗返起呢6年幾做單親媽媽生活,好多甜酸苦辣,希望要堅持,堅毅走未來一步同人生。」

圖︰羅霖迎來53歲生日。(ig圖片)
圖︰一班好友為羅霖慶生。(ig圖片)
圖︰羅霖覺得,歲數係一個數字,最緊要身體健康、心境正面。(微博圖片)
分享: