【23年前劇照】《L風暴》首映白滑舊相被公開 古天樂︰張相關咩事?

圖︰古天樂同張智霖,23年前曾一同拍攝無綫劇集《天地男兒》。(網絡截圖)

古天樂、張智霖(Chilam)等人,昨晚(23日晚)出席電影《L風暴》首映禮,原來古仔同Chilam早喺1995年已經喺無綫劇集《天地男兒》中合作,正所謂「有圖有真相」,現場司儀仲攞埋二人23年前嘅劇照上台,畀古仔同Chilam攞住影相,搞到古仔都忍唔住問︰「張相關咩事?做咩攞出嚟?」

早前古仔邊露為配合新戲角色要努力美白,而古仔昨日現身首映時,皮膚已經變番黑,佢接受訪問時解釋,「部戲已經拍完,皮膚仲白過Chilam而家,同時配合化妝補粉。我本身接受到白皮膚,但只係自己比較鍾意黑。」

Chilam︰全球總票房有3億就全裸曬燈

而睇番舊相嘅Chilam就話:「好懷念,雖然係喺23年前,好似好短時間咁,有好多回憶,睇到以前拍嘅嘢係好有水準。」講到古仔鍾意曬黑,Chilam話:「其實我都試過曬,不過曬完成面雀斑,一點點就唔好睇,所以唔夠膽再曬。」

大家傾得咁高興,古仔仲即場建議Chilam,如果票房好要除衫慶祝;Chilam就話:「如果全球總票房有3億,我就全裸曬燈!」

分享: