【親自報平安】余德丞錄音談身體狀況 「能夠起得番身,真係好好彩!」

圖︰Dickson今日(21日)透過無綫big big channel網頁「報平安」。(網上截圖)

無綫男神余德丞(Dickson)早前參加足球賽後暈倒昏迷,送往瑪麗醫院深切治療部(ICU)搶救,現時已轉往心臟科病房觀察。Dickson今日(21日)透過無綫big big channel網頁「報平安」,並親身交代自己嘅身體狀況;雖然「有聲冇畫」,但從佢嘅聲音,可聽得出佢幾精神,相信出院都係指日可待!

Dickson中氣十足咁話:「Hello,咁多位大家好,我係Dickson余德丞,我真係覺得自己好好彩,非常之感恩,非常之開心,今次可以大步躝過,醒得番再同大家講嘢,所以衷心多謝全香港每一位關心、問候、祝福、集氣,令到我能夠醒得番,真係衷心多謝咁多位。」

心臟曾停頓 感謝大家祝福、集氣

Dickson又講到佢嘅身體情況,話自己嘅心臟停咗一段比較長嘅時間,「其實真係醒番先知道,原來件事都幾嚴重,因為原來昏迷時候,我個心都停咗一段比較長時間,所以…能夠起得番身,再同大家傾偈,真係好好彩!咁…喺呢幾日已慢慢康復,精神咗好多,講嘢都清楚咗,當然醫生都建議留院多一段時間,Check清楚身體係咪真係OK先出到院。」

佢又藉此機會感謝醫護人員嘅照顧,「最後真係多謝瑪麗醫院上上下下醫護人員悉心照顧,同埋係關鍵時刻幫我做心肺復蘇的足球隊隊友,仲有屋企人每日嚟支持我,整嘢畀我食,同TVB上上下下咁多位好同事,及咁多位傳媒朋友,無咗你哋邊一位都唔得,所以希望快啲出院同大家見面,有咩新消息再通知你哋,記住,身體健康最重要﹗」

希望Dickson身體繼續好轉,可以再同大家見面啦!

分享: