【港姐2018】15秒才藝表演似「抖音」 挑戰急口令最好笑!

圖︰2018香港小姐競選將於星期日舉行,今年佳麗被安排錄製15秒才藝表演片段,其中,挑戰急口令最好笑。(YouTube截圖)

2018香港小姐競選決賽將於今個星期日(26日)舉行,無綫昨日(19日)於社交平台上載佳麗的15秒才藝表演,20位佳麗分別挑戰擺pose、跳舞、唱歌等,而最好笑的是挑戰急口令,在4位講急口令的佳麗當中,只有16號黃子桐成功讀出︰「一蚊一隻龜,七蚊一隻雞;佢話龜貴過雞,我話雞貴過龜;咁究竟龜貴過雞,定係雞貴過龜呢?」而1號蘭倚婷就講到口音出晒嚟,最後一句仲講到「跳線」呀!

17號Hera甜笑讀急口令 14號Honey做鬥雞眼

大熱門17號陳曉華(Hera)都有挑戰讀急口令,雖然佢冇成功讀啱整個急口令,但勝在全程keep住甜美笑容,感覺仲幾討好!反觀另一大熱門14號何泳芍(Honey),做表情時就揀咗做「鬥雞眼」等「核突」表情,有網民留言話︰「14號係… 做乜事? 都叫才藝表演?」似乎唔太接受到Honey嘅演繹。

其他佳麗亦有表演跳舞同類似catwalk擺pose,當中9號工藤佑采擺出性感pose,雖然佢表現自信,但網民都真係要啲時間消化呢個表演。至於20號鄧卓殷就「扮車聲」試圖突圍,都算幾「破格」嘅演出。

6號杜愛恩唱自創歌曲 19號楊帆突然轉key似走音

另外,多位佳麗選擇唱歌,6號杜愛恩更加曲、詞、編、唱一手包辦,唱出一首原創歌曲《父母心》,算是「唱歌組」入面較出色一位。而19號楊帆選唱韓劇《來自星星的你》主題曲《My Destiny》,不過唱咗兩句就突然轉key,疑似走音。

而有佳麗就選擇「挑音式」演出,18號高育英更表演「挑音神曲」《學貓叫》,認真有趣!而10號李芷晴就把Twins的《下一站天后》加入動作,都真係幾sweet㗎!

【睇片啦!】

(影片編輯︰Ken Chong)

分享: