【今日登記結婚】陳意涵笑談陀B心情 「當下立刻就罵了一句髒話!」

圖︰陳意涵與許富翔登記結婚,但就要等生完BB先補辦婚宴。(fb截圖)

35歲台灣女星陳意涵同導演許富翔拍拖一年,二人今日(17日)早上在台北木柵文山區登記結婚!陳意涵早前先被朋友爆出即將結婚同已陀B幾個月,陳意涵唯有在登記結婚前夕,在facebook以手繪畫短片宣布結婚及懷孕。

特登揀喺農曆七夕情人節註冊嘅陳意涵,今日都有被問及得知懷孕嘅心情,陳意涵笑言︰「當下立刻就罵了一句髒話!沒有啦,其實很開心!」仲透露BB係男仔嚟,一索得男,認真犀利!

辦登記手續 唔記得搵證人

陳意涵同許富翔於早上大約10點半到達登記處,懷有身孕嘅陳意涵不時用公文袋「遮肚」,當記者問到佢得知自己懷孕嘅反應時,佢就好直接咁話︰「當下立刻就罵了一句髒話!沒有啦,其實很開心!」相信陳意涵真係冇plan過,係意外懷孕嘅。

當二人於櫃檯辦緊登記手續時,陳意涵忽然醒起登記結婚係要有證人嘅!此時,身邊嘅記者即刻起哄話︰「我們都是你的證人呀!」十分幫忙。講到婚宴安排,陳意涵就話:「我要那種超傳統(的婚宴),封街、搭棚、有桌巾的流水席,請大家來唱歌,還要有流動廁所。」但要等BB出世後先會補辦婚宴。

陳意涵又話,自己為咗安胎而推咗好多工作,反而未婚夫就接到唔少工作,都夠幫補奶粉錢嘅!

分享: