【港姐2018】盤點歷屆負評港姐 努力付出真係有回報㗎!

圖︰佢哋都曾經面對負評,最後憑努力,成為觀眾認同嘅香港小姐。(ig圖片)

2018香港小姐競選嘅20名候選佳麗,近日正接受訓練及參與不同活動。競選節目未舉行,先有佳麗因玩「Kiki challenge」被網民怒轟,要六度含淚鞠躬道歉。不過其實選到港姐,都唔一定獲得萬千寵愛,歷屆就有唔少得獎佳麗面對負評;但憑住努力,佢哋最後都搵到自己嘅定位,贏得觀眾愛戴!

馮盈盈 - 2016年港姐冠軍

16年港姐冠軍馮盈盈,於參選期間一直都係大熱門,更順利登上冠軍寶座。不過獲選後即被網民起底,話佢曾經於社交平台用粗言穢語留言;並在一條YouTube影片中,疑似爆粗,有損香港小姐形象,仲被人話係「粗口港姐」!

好彩公司繼續畀機會馮盈盈,讓佢接拍多部劇集,拍攝第一部劇集《果欄中的江湖大嫂》時,演出已獲稱讚。佢亦有主持《學是學非》、《#後生仔傾吓偈》,以及其他直播節目,由於她言論大膽,令其形象深入民心,成功由「粗口港姐」轉為「貼地港姐」。

圖︰馮盈盈成為港姐冠軍後﹐惹來網民起底指她是「粗口港姐」。(ig圖片)
圖︰馮盈盈與麥明詩及陸浩明一同主持《後生仔傾吓偈》節目。(網上截圖)
圖︰馮盈盈在做節目主持時言論大膽,觀眾睇得「過癒」,她亦由「粗口港姐」進化為「貼地港姐」。(ig圖片)

蔡思貝 - 2013年港姐亞軍

13年港姐亞軍蔡思貝,於參選時受評判愛戴,卻因公眾投票唔夠票而屈居亞軍。蔡思貝成為TVB藝人後,隨即獲公司力捧,於多部劇集擔任女主角;點知因為演技不足,被人批評她的演戲生硬、聲線刺耳,後來更爆出虛報學歷傳聞!

由於蔡思貝外型硬朗,被網民改圖惡搞成達哥同木村拓哉;不過蔡思貝一於少理,更憑劇集《踩過界》飾演火雞姐一角,奪得「最受歡迎電視女角色」。蔡思貝演技提升,同時又在跑步、跳舞等方面有好表現,仲同黃心穎、馮盈盈、張寶兒、邵珮詩組成女團﹐翻唱《到此一遊》;成功脫離負評,有更好嘅發展。

圖︰蔡思貝獲選後獲公司力捧,於多部劇集擔任女主角;點知因為演技不足,被人批評她的演戲生硬、聲線刺耳。(ig圖片)
圖︰蔡思貝努力求變,更憑劇集《踩過界》飾演火雞姐一角,奪得「最受歡迎電視女角色」。(ig圖片)
圖︰蔡思貝都有拍古裝戲。(ig圖片)

陳庭欣 - 2010年港姐冠軍

10年港姐冠軍陳庭欣(Toby),當年以「黑馬」姿態登上冠軍寶座;點知因為加冕時嘅一個close up鏡頭,被人批評笑得「奇怪」,仲被取笑其笑容似余慕蓮,有違美貌與智慧並重的香港小姐特質。

其實Toby身材好,比賽時在對答表現得幾好,面對大眾負評,Toby自言會努力證明自己可以勝任香港小姐一職。Toby於獲選後都好勤力,默默地參演不同劇集,雖然多為「小角色」,但其演技勝在夠自然,相信都下過唔少苦功。Toby亦有在不同大騷擔任主持,因為表現出色,開始獲觀眾讚好!

圖︰Toby獲得2010年港姐冠軍時,因其笑容被取笑,被指「笑到好似余慕蓮咁」。(ig圖片)
圖︰Toby努力默默耕耘,亦有份參演重頭劇《深宮計》。(ig圖片)
圖︰Toby8月初在ig「放閃」,其男友為彩豐行老闆楊振源。(ig圖片)
分享: