【慘遭欺凌】簡淑兒去外國讀書畀人蝦 被掟雞蛋、剪頭髮、推落樓梯

圖︰Jessica於電台節目談及於美國曾遭校園欺凌。(ig圖片)

無綫演員、歌手簡淑兒(Jessica)8歲時隨家人移民到美國生活,日前佢接受電台訪問,透露曾經受過「校園欺凌」!Jessica話,試過畀同學掟雞蛋,又收過恐嚇信,更曾經喺學校被同學直接傷害,畀男同學剪我頭髮,甚至被同學推落樓梯。

Jessica仲話,即使老師知道都唔會理,會當聽唔到、睇唔到,真係「慘慘豬」呀!

家住意大利人區 唔識英文被排斥

Jessica憶述:「嗰時我哋一家人住喺意大利人區,得我哋嗰家人係中國人,被同學歧視。因為嗰時我仲未識講英文,啲同學就覺得我好奇怪,唔鍾意我。」

佢又舉例話︰「試過聖誕節期間,我喺屋企門口布置緊,啲同學行過就成隻雞蛋掟埋嚟;又試過收到恐嚇信,信上面畫咗一啲好核突嘅公仔。我又試過喺學校,畀坐喺我後面嘅男同學剪我啲頭髮,被同學推落樓梯。」最慘就係,「就算老師知道咗,都唔會理,會當聽唔到同睇唔到。」

新歌由鄺俊宇作曲填詞 冀治癒人心傷痕

而Jessica嘅新歌《謝謝你 傷過我》都有講到被傷害,呢首歌由現任立法會議員、元朗區議員,同時好鍾意寫作嘅鄺俊宇作曲及填詞,Jessica同鄺俊宇希望,「以歌曲和文字為大家療傷,治癒大家心底的傷痕,成為大家的最佳止痛藥,哭過後要成就一個更好的自己。」

希望Jessica治癒大家嘅傷痕之餘,都可以「自癒」埋童年被欺凌嘅傷痕啦。

圖︰Jessica話,自己細個時好鍾意對星星許願,作為一種寄托。(ig截圖)
圖︰Jessica又話,有時會覺得同動物相處,容易過同人相處。(ig圖片)
圖︰Jessica仲好冧咁同鹿仔「談情」!(ig圖片)
分享: