【美女廚房】Kiwi程美段冇得留低 請假之外仲有咩被炒原因?

圖︰「美女學徒」Kiwi程美段,喺新開拍嘅6集《美女廚房》入面冇得留低!(ig截圖)

由林盛斌(Bob)、蕭正楠、張振朗主持嘅《美女廚房》,近日宣佈加推6集,一班「美女學徒」更有新衫着,由藍白廚師衫變成紅黑色背心裙,望落更醒神!不過,有唔少粉絲支持嘅「美女學徒」程美段(Kiwi),喺新開拍嘅6集入面就冇得留低;對於Kiwi點解被炒?無綫冇交代原因,Kiwi自己同其他「美女學徒」就估計,被炒係同佢要求請假,或早前現身動漫節有關。

Kiwi︰上一次入廠被調坐後排

傳媒問Kiwi被炒一事,Kiwi話,係PA「突然間」同佢講「新嘅集數唔使我返去」;而當Kiwi問PA原因時,PA只係回應︰「唔清楚,唔好意思」,但Kiwi就話,之前拍攝嘅時候都Feel到有啲奇怪。Kiwi舉例指:「其實拍節目嘅時候會預先拍一啲『美女學徒』嘅反應Shot,之後先會正式錄影。之前都有拍我嘅反應Shot,但上一次入廠拍節目之後,就再冇拍我嘅反應Shot,仲特登調我坐後面。」

而Kiwi認為,被炒同自己想請假有關,「其實嗰次拍晒反應Shot之後,我就問PA話反應Shot拍晒,夜晚有啲事可唔可以行得開?因為我嗰晚想請假去Casting,都係臨時收到通知。嗰時監製都喺隔離,佢就反應好大,仲話:『如果你今晚唔出現嘅話就以後都唔使嚟。』即係唔再用我。咁後尾嗰晚我都選擇留低拍埋佢冇去到Casting。」

另外,在傳媒報道她拍過藝術祼照時,Kiwi亦被傳召「照肺」,「嗰時我返到去,佢哋已經唔多鍾意,仲問我:『仲有冇其他相,仲話高層都好關注咁樣。』仲有動漫節啲報道…… 我諗我呢啲出位嘅行為同報導,佢哋不嬲都唔滿意。」

洛兒估計︰與現身動漫節出現有關

昨日(15日)一班「美女學徒」着住新衫返將軍澳電視城錄節目,「學徒」之一嘅洛兒就話,唔清楚Kiwi被炒嘅真正原因,「其實我哋成班都好Friend,但佢(Kiwi)俾人踢走就冇同我哋講原因,但我有睇過篇報道,可能同佢前排喺動漫節出現有關。」

洛兒又話︰「其實美女廚房真係一個好好嘅機會嚟,可以有一個好發展嘛。(會唔會唔敢請假?)我工作時間安排得好好,有預留時間拍攝《美女廚房》。」自從在幕前工作,洛兒對於感情時亦低調處理,「公司唔方便我講太多,因為自從做咗幕前之後公司唔畀我講太多。」咁乖、咁抵錫,相信洛兒有望在一班「美女學徒」中突圍而出!

圖︰Kiwi日前於ig貼出「最後一張」《美女廚房》造型照,仲話要「向前看」。(ig截圖)
圖︰Kiwi今年於動漫節現身,以一身兔仔Look成功突圍,更令其ig粉絲數目急升。(ig圖片)
圖︰另一位「美女學徒」洛兒就乖好多,會預留時間拍節目,又將感情事低調處理。(ig圖片)
分享: