【首次crossover】楊千嬅、杜德偉10月開騷 究竟佢哋有咩淵源?

圖︰Alex同千嬅嘅音樂會,將於今年10月3日喺亞博舉行。(網上截圖)

杜德偉(Alex)同楊千嬅crossover?無錯!今年10月,Alex同千嬅將會來個新嘗試,就係一齊開音樂會喇!唔講可能唔知,Alex同千嬅曾經係「同門師兄妹」,大家都係「華星之友」,所以已經認識多年。事隔多年,Alex同千嬅都齊齊「升呢」做爸媽,所以平日都會傾吓屋企同「湊仔經」。

互唱對方歌曲加跳舞

今次Alex同千嬅獲品牌邀請一齊開騷,雖然佢哋以前都有合唱過,但crossover開演唱會都係新嘗試!拍宣傳海報時,Alex準備咗「斯文look」同「rock look」,而千嬅就揀咗一條好搶眼嘅桃紅長裙影相。

至於今次演出有咩亮點?Alex就話:「以前有一齊合唱過廣東歌,今次會有國語、快歌、慢歌,互唱對方嘅歌,而跳舞當然走唔甩,不過都要睇排舞老師點安排。」佢又話︰「喺計劃今次演唱會內容嘅過程中,我們都覺得好精彩,想同更多觀眾朋友分享;所以之後我好希望會有更多合作,甚至可以衝出香港,同更多歌迷見面。」

「AIA主辦: 楊千嬅 杜德偉 音樂會」將於今年10月3日喺亞博舉行,音樂會一夜限定,門票不作公開發售,只供客戶抽獎贏取,門票總共500套、每套2張。

圖︰千嬅最近忙於拍攝TVB劇集《多功能老婆》。(ig圖片)
圖︰Alex日前就現身美國時代廣場,仲影咗唔少靚相。(ig圖片)
圖︰千嬅同Alex曾經在TVB節目合唱《愛全為你》。(fb圖片)
分享: