【兄弟大茶飯】蕭正楠曹永廉拍住上 言論踩界邊煮邊講!

圖︰由蕭正楠和曹永廉主持嘅《兄弟大茶飯》,播出後大受歡迎。(影片截圖)

由蕭正楠同曹永廉(阿廉)主持嘅無綫綜藝節目《兄弟大茶飯》,已於星期一(7月30日)啟播。節目雖然以烹飪包裝,但呢個夜晚10:30先播出嘅節目,不乏踩界言論;一對「孖寶兄弟」更加肆無忌憚互寸互窒,邊煮邊講大放笑彈,同時揭開藝人「敢言」嘅一面!首兩集播出後,即獲觀眾追看,更有望成為今年最受歡迎嘅綜藝節目。

滷水鮑魚、醉雞翼 阿廉話蕭正楠︰你滷味!

蕭正楠同阿廉每集都會化身廚師,再將美食「送上門」,慰勞一班需要拍外景嘅藝人同事。好似第一集,佢哋就親自準備定滷水鮑魚、醉雞翼,連雞蛋仔夾雪糕都有!佢哋將美食帶到TVB Amazing Summer記者會「益街坊」,一班藝員就食到「舐舐脷」,劉佩玥(Moon)仲偷偷留起美食畀自己慢慢嘆!而馮盈盈同兩位主持講想食「黑鮑」,即畀蕭正楠話:「你個樣咪鮑魚囉!」

其實節目中不乏「玩諧音」,例如︰當林夏薇試完兩位主持親手整嘅滷水牛腱之後,想問邊位仁兄滷得咁出色,蕭正楠就指住曹永廉話:「老嘢滷嘅!」曹永廉聽完後反擊一句:「你滷味!」相當踩界。

試食鱈魚膠 千嬅︰乜嘢膠話?

而第二集,蕭正楠同阿廉就為《多功能老婆》劇組炮製「高檔光速飯餐」,劇集主角楊千嬅同黃浩然都有現身試食;不過因為蕭正楠同阿廉喺烈日當空下整溫泉蛋海膽飯,搞到千嬅同黃浩然擔心食物唔衛生,大叫︰「食唔食得㗎!」阿廉即刻話︰「食得!你個廁所咁近,有咩所謂呀!」

兩位主角又試食斧頭扒,千嬅又大叫︰「好韌喎!」阿廉就話︰「我睇你年紀先畀舊韌啲你咋!」到之後食花膠糖水時,阿廉介紹︰「呢個係鱈魚膠嚟嘅!」千嬅即刻搵到位「報仇」,同阿廉講︰「乜嘢膠話?」踩界言論一浪接一浪,直情將主持同藝人嘉賓「敢言」嘅一面,「原汁原味」呈現觀眾眼前!

喺今(8月1日)晚播出嘅第3集,蕭正楠會帶埋余思霆,去搵身處橫店拍《包青天再起風雲》嘅阿廉,並用電飯煲為劇組煮一餐「思鄉飯煲餐」,唔知今集又會爆出乜嘢新金句呢?

圖︰雜貨店老板話煮滷水要落甘草,蕭正楠即對住阿廉話:「即係加埋你!」諷刺阿廉係「甘草演員」。(影片截圖)
圖︰曹永廉偷食鮑魚,蕭正楠見到就話:「你偷食?仲要食鮑魚?你對唔對得住你老婆,對唔對得住你對仔女,對唔對得住你Fans?」聽到弦外之音嘅觀眾,相信已經笑到轆地。(影片截圖)
分享: