【美食引誘?】許廷鏗為演唱會減肥 欣宜整嘢食︰佢可以唔食㗎!

圖︰許廷鏗最近努力為演唱會減肥,更「投訴」Joyce成日整美食引誘佢!(ig圖片)

鄭欣宜(Joyce)2017年正式開店賣曲奇,平時亦會於ig分享一下整嘢食影片。最近忙於為演唱會減肥嘅老友許廷鏗更「投訴」,Joyce成日整美食引誘佢︰「試過拉筋嗰陣鄭欣宜用嘢食引我,佢做人唔夠道德。」Joyce今日(31日)回應「指控」,笑言︰「唔關我事呀,佢可以唔食㗎嘛!」

欣宜自嘲「年紀大機器壞」

畀許廷鏗話「唔夠道德」嘅Joyce,其實都知道老友要開騷減肥,不過佢話「唔係淨係整畀佢食㗎嘛,仲有其他朋友」,所以就叫許廷鏗︰「唔好搵我!」至於會唔會為老友整健康餐?Joyce就話︰「佢自己有佢自己嘅人幫佢處理呢啲嘢啦!」

Joyce話嚟緊都有新嘅工作,加上最近要準備裝修,生活都好充實吓!被問到會唔會冇時間拍拖?Joyce就話:「愛情要嚟嘅時候擋都擋唔住。依家每日瞓得2、3個鐘,年紀大機器壞,沖涼擰轉身攞沖涼液都扭親頸,要睇針灸,好渣皮,不過有嘢做總好過喺屋企等,都開心嘅。」

圖︰Joyce同許廷鏗真係好老友,ig成日都會見到佢哋嘅合照。(ig圖片)
圖︰Joyce自2013年起創立自己嘅曲奇品牌,2017年仲開埋實體店。(ig圖片)
分享: