【罕見同台】王菲兩囡齊亮相異常興奮 竇靖童︰未見過媽咪咁……

圖︰有現場觀眾爆料﹐指王菲與囡囡竇靖童(圖左下)及李嫣一齊於節目亮相,表現異常興奮。(網上截圖)

王菲最近參與內地綜藝節目《幻樂之城》,擔任體驗官(評判);節目錄到第5集,出現王菲同兩個囡竇靖童以及李嫣,同台亮相嘅罕見場面。王菲更加表現興奮,當竇靖童演唱完畢,即獲媽咪興奮衝到台上來個大擁抱。王菲話為女兒感到驕傲,畀評語仲畀咗成20分鐘;連囡囡竇靖童都忍唔住話媽咪︰「沒見妳(王菲)這樣過!」

竇靖童第5集現身演唱 獲王菲大讚

有在場的網民爆料,指竇靖童未上台前好緊張,王菲即刻上台攬一攬佢,又指住台下面嘅細囡李嫣,為竇靖童打氣。而當囡囡演出完,王菲更興奮到衝上台大攬竇靖童,仲話︰「竇小姐,我太滿意了!」又話囡囡嘅演出「能算一個藝術短片去參賽」。之後細囡李嫣都上埋台,三個人罕有同台攬攬,咁罕有嘅場面,令全場觀眾情緒高漲!

而王菲評價竇靖童,足足講咗20分鐘!主持何炅請佢落台休息,佢都完全唔理繼續講。另一位節目嘉賓陶晶瑩都話,識咗王菲咁多年,都係第一次見到佢咁激動。連竇靖童自己都話,真係冇見過媽咪咁樣;而王菲就即刻話︰「胡說,這不是沒參加過這種嘛!」

其實喺第一集入面,王菲於開場唱《夢中人》嘅時候,已經一改以往好Cool嘅台風,喺台上又跑又跳;當觀眾向佢大叫︰「我是您女兒的粉絲,感謝你用彩色的夢給童童(竇靖童)編織未來。」時,王菲仲笑得好激動!似乎佢真係一講起囡囡就會異常興奮。

圖︰網民大爆現場情況,更指看到三人擁抱時,感動得大哭。(網上截圖)
分享: