【金秘書為何那樣】甜蜜結局曝光 金秘書副會長結婚了!

圖︰(網上截圖)

tvN人氣韓劇《金秘書為何那樣》昨晚(26日晚)播出大結局,焦點當然係「副會長」朴敘俊同「金秘書」朴敏英嘅婚禮啦!上一集結尾,金秘書講咗一句唔可以結婚,令人擔心佢係咪又有咩心理關口未衝破,點知原來只係因為未來奶奶太錫佢,令佢壓力太大咋!

金秘書獲副會長媽媽厚待

第16集一開始,愁爆嘅副會長去咗搵老友傾計,仲問咗一句「金秘書為何那樣」;鏡頭一轉,副會長同金秘書就坐咗喺辦公室「見家長」!副會長媽媽同金秘書講,自己一直好想要個囡,因為可以一齊行街」,仲帶金秘書去睇「相見禮」嘅衫,搞到金秘書唔知點算好,而副會長媽媽仲買咗一大堆靚衫畀金秘書;過貴婦生活、買衫唔洗睇價錢,相信係好多女仔嘅夢想,不過金秘書就覺得好唔習慣。

到「相見禮」當日,身穿新裙嘅金秘書,帶埋爸爸同家姐到副會長嘅豪華大屋;副會長媽媽仲話準備好禮金,仲要買車、買屋送畀金秘書屋企人!點知金秘書壓力「爆煲」,而講出︰「如果係咁樣嘅話,我唔可以結婚,非常感謝您咁對我,但要接受咁貴重嘅禮物,令我好有負擔。」好彩當面講清楚之後,婚事繼續進行!

金秘書掛住返工 試婚紗都遲到

籌備婚事,少不免會有磨擦;原本副會長同金秘書去買新婚夫婦家庭用品都好sweet嘅,點知到試婚紗時,金秘書竟然因為掛住做嘢而遲到。一早已經為金秘書安排好婚紗同頭飾嘅副會長,當然嬲爆啦!金秘書本來想帶副會長飲咖啡消氣,點知副會長提起金秘書曾經去相睇一事,搞到金秘書發火,嬲到要搵同事飲燒酒呀!

好彩金秘書諗落都覺得自己有錯,仲着住婚紗去搵副會長,話自己試婚紗失約,所以要補試婚紗畀佢睇;金秘書好冧咁錫返副會長,又化解婚前一次危機。到婚禮前一日,副會長本身想同金秘書過,但金秘書就話要同家人過,所以副會長亦有機會同哥哥men’s talk,因而知道金秘書對花粉過敏。副會長即刻決定,取消所有婚禮入面嘅鮮花;佢同金秘書講完呢個決定,金秘書冧到叫副會長「老公」!

婚禮當日,副會長緊張到腳震,金秘書即刻照顧佢。新郎同新娘終於進場,副會長話要一世保護金秘書,金秘書話信佢,因為副會長由5歲開始已經承諾過佢呢樣嘢!情深對望、幸福笑等當然唔少得,最後二人情深咀嘴,副會長仲講咗句:「你是我的世界,我所有世界之間都是你。」至於度蜜月?劇入面冇交代去邊,因為副會長暗示話去邊都冇所謂,因為佢唔會離開間房。

圖︰「相見禮」當日,金秘書帶埋爸爸同家姐,到副會長嘅豪華大屋。(網上截圖)
圖︰婚禮當日,副會長驚到腳震。(網上截圖)
圖︰二人排除萬難,終於身穿婚紗、禮服步入禮堂。(網上截圖)
分享: