【近距離接觸】Kelly旺角麥花臣開騷 坐台邊與Fans握手

圖︰Kelly昨(25日)晚於旺角麥花臣場館開show宣傳《Watch Me》新碟,仲坐埋去台邊同Fans握手!(fb圖片)

最近剛推出新碟《Watch Me》嘅陳慧琳(Kelly),昨日(25日)首次於旺角麥花臣場館舉行音樂會,難得喺中型場館演唱,Kelly唔單止落足心機演繹新碟歌曲,仲近距離與Fans接觸!佢邀請Fans上台一齊玩,更走到舞台前,坐喺台邊同Fans握手,相當親民!

換足三套衫 兩度Encore

Kelly今日於facebook發佈音樂會相片,仲留言話︰「昨天拼命工作後今天起身個心悶悶地好似 jet lag 咁,同埋好似琴晚發咗塲好長嘅夢。多謝Moov(主辦音樂會)同大家嘅支持,俾我有機會發這場飄離現實的夢,下次再玩過啦!」

在音樂會上,Kelly換足三套衫,又唱又跳;更兩度Encore,唱出經典作品《最佳位置》同《最愛演唱會》答謝歌迷支持。點知Fans依然唔肯走,要Kelly話:「冇歌啦,要聽就要紅館再見。」對於首次在旺角開騷,Kelly好興奮咁話︰「呢度真係好方便、好近屋企,五分鐘就返到去!」

佢又話,囝囝蝦餃仔同小籠包於晏晝彩排時都有到場,仲話忙完今次演出,可以陪囝囝放暑假!至於幾時再去紅館開show?Kelly話:「希望唔好太耐,但要等我再儲多啲歌先,希望盡快啦,上一次開紅館已經係2015年。」

圖︰音樂會無論係造型、音樂、編排同舞台設計都落足心思。(fb圖片)
圖︰Kelly落力又唱又跳!(fb圖片)
圖︰Kelly一晚換足三個造型,配合新專輯的歌曲。(fb圖片)
分享: