【我真係唔得呀!】陳敏之做旅遊節目變「港女」 網民意見兩極

圖︰陳敏之同區永權為無綫主持旅遊飲食節目,對於敏之嘅表現,網民意見真係有啲兩極化。(網上截圖)

陳敏之同區永權(Albert)為無綫主持旅遊飲食節目《到此一遊 台北》,帶觀眾食地道美食同玩新景點。不過節目播出後,有唔少網民都唔太like敏之嘅主持作風;好似早前播出嘅一集,要去食臭豆腐,敏之喺鏡頭前皺晒眉、扁晒嘴,擺出一副「慘樣」,搞Albert要「硬食」,令人覺得佢唔夠專業。但亦有網民認為,敏之做到咁「港女」都係為咗「交戲」,幫節目營造吓氣氛啫!

怕肥唔去夜市「掃街」

敏之於節目中,展現唔少「港女」行為,包括︰食酸菜白肉窩露出痛苦表情、唔肯食全台灣最臭嘅臭豆腐,聞一聞都話臭到想「爆粗」、連夜市「掃街」都唔肯去,話怕肥喎!不過,網民又發現,當敏之試食貴價台灣菜,個人即刻開心晒,仲食得好寬容、好Enjoy!

除咗食嘢揀擇,敏之對於住同玩都好有要求!睇返節目宣傳片,當介紹親子露營勝地時,Albert整好咗個帳幕之後,大叫敏之都叫唔到佢返嚟,而敏之介紹嘅露營住宿,就有晒雙人床,成間豪華酒店房咁。而唔行夜市嘅佢,就好鍾意行貴價文具店,仲話自己置身其中會專心唔到呀!

有網民話敏之︰「港女上身,堅難頂」、「好多嘢都唔食,做乜鬼飲食節目」;不過亦有網民覺得︰「夠真先好睇」,或認為敏之係為咗營造氣氛先扮出嚟嘅。

圖︰敏之拍旅遊節目都影咗唔少chok相同靚相。(ig圖片)
分享: