【等嘉穎返嚟講】陳凱琳一早已請假 樂易玲︰結婚機會高

圖︰鄭嘉穎同陳凱琳嘅婚事愈傳愈熱,婚禮時間、地點已傳出,只係仲未知有咩人去。(網上截圖)

鄭嘉穎同陳凱琳(Grace)嘅婚事愈傳愈熱,雖然嘉穎同Grace曾經出嚟否認過「奉子成婚」,但佢哋嘅峇里婚禮時間、地點似乎有齊,只係唔知有咩人物會出席。咁負責藝員管理嘅樂易玲(樂小姐),又知唔知邊個會出席呢?

「發現嘉穎嘅好多朋友都請假」

樂小姐話,Grace一早就向公司請咗個短假,都批咗喇,「我哋嗰陣時大家都覺得係去幫嘉穎慶祝生日。但我到依家都唔知佢係結婚定慶祝生日,因為我睇到都係傳媒啲新聞啦,咁我就開始留意下近排有乜嘢同事一齊請假,咁我見到嘉穎好多好朋友、好兄弟,好多合作多年嘅朋友都有請假。不約而同都係嗰段日子啦,咁都可能係慶祝生日嘅。」

至於Grace被傳「奉子成婚」,樂小姐就話:「我又唔覺喎,我見過佢,我又覺得乜嘢都冇喎。」又話︰「啲同事問過佢,佢話唔係。」至於二人有意結婚,有冇同佢講過?樂小姐指,都有問過Grace,「Grace話等嘉穎(在大陸拍完劇)返香港,再同大家食飯坐低慢慢傾,依家未囉!」

所以綜合種種跡象,樂小姐得出呢個結論︰「(嘉穎同Grace)結婚機會高,(Grace請假)幫男朋友慶祝生日嘅機會都有嘅。」

分享: