【復合有望?】陳家樂:呢啲嘢遲啲先講 余香凝:唔諗喇!

圖︰余香凝同陳家樂於今年6月分手。(ig圖片)

余香凝同陳家樂自從6月爆出疑因第三者介入而分手,男方就密密出活動,女方就一直四圍飛,先後去咗馬來西亞、台灣和紐約拍戲同出席電影節活動。余香凝昨日(19日)出席「古天樂電影院」命名儀式,係佢分手後首次公開露面;被問到同陳家樂有冇機會復合?余香凝話︰「呢啲嘢唔諗喇,都係做嘢緊要。」但承認二人都仲有聯絡。而陳家樂出席手錶品牌活動時就回應︰「呢啲嘢遲啲先講。」唔知係咪仲有轉機?

余香凝唔認去散心 將學潛水想去紐約進修

余香凝被問到出外工作有冇去散心,佢就話︰「劇組好好,喺馬來西亞請我食榴連,去到台灣繼續食食食,到紐約都係。」但否認要散心。余香凝又話,自己幾個月前萌生學潛水嘅念頭,但就令媽咪好擔心,怕佢做傻事,佢就話︰「學潛水同做傻事係兩件事。」

佢又提到自己去紐約時,特別多留幾日,因為打算之後去紐約修讀演戲課程,想先熟習一下環境。周圍飛,又唔認要離開傷心地,但對於復合,余香凝就明確表示︰「呢啲嘢唔諗喇,都係做嘢緊要。我同家樂都仲有聯絡,互相問候吓大家。」而陳家樂昨日出席另一活動時,亦承認同余香凝仍有短訊聯絡,至於復合一事,陳家樂似乎樂觀啲,話「遲啲先講」。

其實陳家樂一早視余香凝為結婚對象,就算余香凝之前因車禍而鼻骨爆裂,佢都對女方不捨不棄。睇嚟要散心嘅,應該係含淚分手嘅陳家樂先啱喇!

圖︰余香凝日前於ig上載一幅「跨步向前」相,留言話︰向前走,似係下定決心棄舊情。(ig截圖)
圖︰陳家樂分手後寄情工作,密密出活動。(ig截圖)
分享: