【誰是誰非?】劉鑾雄希慎鬧少女玩手機 網民︰有錢大晒 VS 港女唔啱

圖︰大劉日前被目睹同甘比、囝囡等去咗希慎廣場,並與一位路過、睇緊手機嘅少女發生爭執。(網上截圖)

華人置業老闆劉鑾雄(大劉),日前被目睹同甘比、囝囡等去咗希慎廣場,仲同一位路過、睇緊手機嘅少女發生爭執。由於大劉真係鬧得好大聲,引來途人圍觀,更有人拍埋片告知傳媒;網民睇到呢件事,紛紛留言發表已見,有人覺得「有錢人大晒咩」,亦有唔少人撐大劉做得好,話「港女」顧住睇手機係抵鬧!

大劉怕囝囡被撞 戴住口罩鬧少女睇手機

據悉﹐事件於前日(18日)發生,即將67歲嘅大劉與家人在保鑣陪同下行到希慎廣場,期間一名少女懷疑因為顧住睇手機,差啲撞親大劉同甘比嘅寶貝囝囡。雖然甘比一路諗方法平息事件,但大劉真係好嬲,同個少女由地下一路鬧到上2樓。個位少女仲大膽話︰「你唔敢呀?」仲叫大劉「積福」;搞到大劉再鬧佢︰「積你個福!積你XX!佢(囝囡)受傷係咪你賠呀?」

個位手機少女自稱有睇清楚路況,但大劉就話︰「你掛住睇你嘅(手)機呀!」雖然從在場人士拍得嘅片段,真係睇唔晒成件事嘅來龍去脈﹐但網民睇完片之後,都忍唔住留言發表意見。有網民話︰「咁有貨買起佢唔比人行咪得囉!幾廿歲同條?妹嘈,一啲風度都無!算把啦!」但唔少網民就撐大劉鬧得好︰「做錯事唔認仲要話番人轉頭『有錢大曬』!大劉呢個人我唔鍾意,但呢件事佢無錯喎。」

網民︰港女最鍾意耷低頭玩電話

唔少網民開始將事件延伸到自己嘅經歷,話好多港女都鍾意耷低頭玩電話阻住條路,所以覺得睇手機少女抵鬧。「鬧得好!今時今日眼見太多只顧看手機亦不顧途人…..尤其90後港女….」、「個女仔應該講句對唔住。結尾她說別人罵他,完全都沒覺得邊行邊用手機不對。有錢唔係大曬,但是沒錢的人也應該有D禮貌及注意安全。」

亦有網民認為,大家都唔知整件事嘅經過,點解要評論咁多?「其實段嘢都冇話撞到人 小心跟車太貼」。

分享: