【地窿定草叢呀】楊思琦重提《人生馬戲團》事件 講法同鍾嘉欣有咩出入?

圖︰(網上截圖)

01年港姐冠軍楊思琦推出首本寫真集,仲於寫真內重提13年前拍無綫劇集《人生馬戲團》時遇上嘅遇襲、失蹤事件。不過思琦所講嘅版本,就同鍾嘉欣(Linda)3年前於《娛樂3兄弟》節目所講嘅版本有好大出入!其實13年來,呢件事嘅起因都眾說紛紜,究竟有咩唔同嘅版本?即刻對比一下。

客貨車VS的士

思琦同Linda都有提到,有一班人拎住月形彎月話衝出嚟,但思琦就話聽到好急速、好響客貨車嘅開門聲,班人就喺客貨車衝出嚟!至於Linda嘅版本就係,自己行前截的士,點知一開門,就有十幾二十個男人,拎住圓月彎刀衝出嚟!

草叢VS地窿

思琦憶述,班男人衝出嚟之後,佢就同Linda一齊逃亡,「我知道如果被人捉到我一定『渣都冇』,其實我已經無力再跑,因為腳軟,全靠Linda死拉住我,後來見到草叢就一齊跳入去。」等等先,根據Linda嘅版本,佢哋係跳咗入地窿藏身嘅。

Linda話︰「追到掘頭路,我覺得我哋死梗,但唔知點解有啲磚疊到咁高嘅,有啲垃圾又係疊到咁高嘅,有啲樹枝喺呢度嘅,寧寧舍舍有咁大個窿喎,我就話『思琦,跳!』。」咁究竟佢哋去咗草叢定地窿藏身呢?

點錯相VS得罪人

其實除咗思琦同Linda嘅「逃生」經歷疑點重重,事件起因,至今都係一個謎!劇集男主角唐文龍曾經向傳媒表示,事件起因「可能俾人點錯相!」;不過亦有另一講法話,當年有參演此劇嘅男藝人,去夜店玩嘅時候得罪咗人,所以先會發生呢次遇襲、失蹤事件嘅。

學rapper MC Jin(歐陽靖)話齋︰「過去嘅事,就係就係過左去嘅事。」無論真相如何,最緊要無事!

圖︰Linda同思琦13年前一齊拍《人生馬戲團》,仲一齊逃亡呀!(網上截圖)
圖︰2012年3月8日,楊思琦在微博宣布誕下囡囡楊卓穎(Krystal),但拒絕公開男方身份,楊思琦成為單親媽媽,獨力照顧囡囡;圖為思琦與母親及囡囡合照。(Instagram圖)
圖︰鍾嘉欣2015年底成婚,16年誕下大囡,今年3宣布再陀B。(Facebook圖片)
分享: