【老婆擺烏龍】6歲半大囡無跳級? 陳浩民︰搞錯學制、純粹誤會

圖︰陳浩民太太蔣麗莎竟然擺烏龍,搞錯大囡升咩班。(網上截圖)

嘩,真係一個好大嘅誤會呀!陳浩民太太蔣麗莎日前(16日)於微博開心宣佈大囡雅薷幼稚園畢業,仲話雅薷將於9月升讀小學三年班;有網民發現雅薷剛剛幼稚園畢業就升小三?蔣麗莎仲回覆佢因為「跳了兩級」。正當大家大讚雅薷資優嘅時候,爸爸陳浩民竟然話︰「老婆搞錯,純粹誤會,個女冇跳班,太太唔清楚香港學制以為佢跳班啫!」真係要出動阿姐名句︰「嚇死人咩,個心離一離呀!」

蔣麗莎曾讚大囡係「學霸」

家長「望女成龍」,明白嘅;蔣麗莎就曾經於微博上載大囡成績表,看到雅薷真係好叻女,仲科科攞星星?!蔣麗莎仲開心留言話︰「想不到陳家出了一個『學霸』為你感到驕傲~戒驕戒傲,繼續保持! ​​​​」

今次蔣麗莎擺烏龍,陳浩民就解釋,因為雅薷讀國際學校,係用英國學制,與香港學制唔同,所以蔣麗莎就將兩個學制混淆,產生今次呢個咁大嘅誤會喇!而蔣麗莎擺嘅烏龍,其實唔止係跳級呢一點㗎;當網友讚雅薷6歲半就升小三好叻女,蔣麗莎就更正網友話囡囡7歲。其實雅薷11月先迎來7歲生日,話佢6歲半係非常準確嘅,唔知蔣麗莎係咪唔太習慣點樣計歲數呢?

分享: