【開心速遞】根叔、KC、Terry惡搞《大叔的愛》 同原劇有幾似?

圖︰《開心速遞》惡搞《大叔的愛》嘅一集已播出,究竟劇情同原劇有幾似?(網上截圖)

無綫處境劇《愛‧回家之開心速遞》昨(18日)晚惡搞BL日劇《大叔的愛》,劇情講到Terry(李偉健飾)想搵人同佢排戲,但舅父KC(歐瑞偉飾)嫌劇情肉麻,Terry遂搵根叔(劉丹飾)幫忙,仲話會畀錢幫佢排戲嘅人。聽到有錢收,根叔當然好樂意幫忙啦!點知KC見Terry同根叔「行得咁埋」,怕影響自己同Terry嘅「舅甥情」,最後仲硬住頭皮、沖埋入浴室幫Terry排埋錫錫一幕呀!

KC根叔爭Terry 鬥講優點似足原劇

《開心速遞》呢集《根叔的愛》,有唔少橋段都因為Terry排戲一事,而成功由原劇置入劇中。好似KC唔想根叔再同Terry排戲,三個人面對面爭來爭去嘅場面,就同《大叔的愛》部長同阿牧與春田田「攤牌」劇情好相似。

而KC更加問根叔︰「Terry有咩優點?」根叔話︰「有錢、豪爽、唔孤寒、慷慨。」KC就話呢啲都係表面嘢,話Terry︰「無腦、勁蠢、遲鈍、敗家、缺乏自理能力,呢啲唔係問題呀,最重要係我接受佢、我包容佢。」根叔聽到即刻為Terry反擊︰「我話你聽呀,Terry唔係咁嘅人!」KC同根叔仲鬧到臉紅耳熱,搞到Terry「春田田」無奈樣上身,叫二人唔好再嘈。

Terry錯解劇本 對手原來係女人

由於劇本寫嘅「師徒情」愈演愈烈,KC睇住Terry同根叔愈行愈埋,真係好火滾。不過原來一切都係一個美麗嘅誤會;Terry收到導演電話,原來所謂嘅師父係女人嚟㗎,不過因為Terry冇聽清楚導演解釋,就繼續同根叔演肉緊相擁一幕,仲「唔小心」畀KC睇到呀!

最後一切真相大白,大家仲笑Terry同根叔,不過KC仍然唔知真相,仲偷睇埋之後嘅劇本!咁啱Terry同「春田田」一樣,沖涼唔記得攞毛巾,就上演到呢場Terry被KC錫錫嘅經典一幕喇!睇完成件事,其實都幾佩服編劇可以諗到點樣將《大叔的愛》融入劇中;而網民都好受落,於社交平台分享劇中片段。

圖︰Terry沖涼唔記得攞毛巾,搞到KC有機會同佢演埋劇本中的錫錫一幕。(網上截圖)
圖︰劉丹扮部長,神情一樣做到足㗎!(網上截圖)
分享: