【開心速遞】惡搞《大叔的愛》場景 Terry沖涼畀KC錫額頭

圖︰無綫處境劇《愛‧回家之開心速遞》,惡搞BL日劇《大叔的愛》嘅經典場面。(網上截圖)

無綫處境劇《愛‧回家之開心速遞》竟然出現BL日劇《大叔的愛》嘅經典場面?喺劇集預告入面,正當Terry(李偉健飾)沖沖吓涼,舅父KC(歐瑞偉飾)竟然強行拉開浴簾,錫咗Terry額頭一啖話要作為獎勵。想知點解KC會錫Terry?今晚(18日)就知道喇!

以「根叔的愛」為名 劉丹都會演埋一份

據TVB官網嘅每集內容簡介﹐呢一集《開心速遞》就叫《根叔的愛》!李偉健仲喺facebook預告:「新三角關係出現了 #開心速遞」,似乎劉丹飾演嘅根叔,將會介入KC同Terry兩舅甥嘅感情呀!

其實《大叔的愛》熱播之後,網民都有諗過如果拍港版,劉丹就係演大叔部長嘅最佳人選!估唔到《開心速遞》真係將呢個概念實行,唔知會唔會因而推高收視呢?

圖︰Terry神情激似春田田!(網上截圖)
分享: