【無懼素顏】自信女星逐個捉 唔化妝?又如何!

圖︰女星有自信,連素顏都唔怕!(網上截圖)

女人最緊要有自信,而以下呢10位,更加自信到無懼素顏!雖然佢哋可能都會戴下大眼仔,畫吓內眼線同戴眼鏡,但貴為明星都可以做到幾乎零化妝,真係少啲勇氣都唔得。

李佳芯

最近於無綫熱播劇《BB來了》飾演女主角嘅李佳芯,原來都好敢於以真面目示人。劇中佢飾演一名新手媽咪,被網民大選演得「貼地」;而網上亦搵到佢素顏嘅相片。35歲嘅李佳芯雖然都有戴眼鏡,但主要係營造文青、同埋鄰家女孩感覺,而且見到佢皮膚keep得好好,唔上粉都好白呀!

圖︰李佳芯。(網上截圖)

黃心穎

黃心穎係2012年港姐亞軍,現年29歲嘅佢一直都係網民心目中嘅女神!黃心穎天生麗質,加上與馬國明愛得甜蜜,有愛情滋潤當然又靚又有自信啦!黃心穎於《宮心計2深宮計》飾演甘若芊一角,宮女Look都令人留下深刻印象,平日就算唔化濃妝,只係輕輕畫個內眼線或者戴大眼con,已經好靚喇!

圖︰黃心穎。(網上截圖)

陳煒

同樣有參演《宮心計2深宮計》,飾演太平公主嘅陳煒,雖然已44歲,但素顏都一樣又靚又有自信。作為90年代選美入行,一定係「真材實料」嘅美女!陳煒近日分享一張全素顏照,原來唔化妝嘅佢都有另一種自然美,而且望落仲好似更加後生?!又自信、演技又好,真係好有實力!

圖︰陳煒。(網上截圖)

王君馨

32歲嘅王君馨﹐07年參加港姐競選獲得亞軍,入行後最為人熟悉就係飾演《城寨英雄》花曼一角。睇返王君馨嘅素顏相,眼圈、皮膚比較黑,但五官好靚!而王君馨於劇中打八極拳,身材Fit之餘,更無懼於疲倦時以素顏示人,自信心爆燈!

圖︰王君馨。(網上截圖)

除咗以上4位敢素顏嘅自信女星,以下呢6位都係無懼素顏嘅女明星!至於邊個素顏最好睇,邊個同上妝之後分別最大,就留返畀大家自行判斷喇!

圖︰入行15年,已晉身TVB一姐嘅胡定欣。(網上截圖)
圖︰朱晨麗,2011年港姐冠軍,有「翻版陳法拉」之稱。(網上截圖)
圖︰台灣出生嘅劉心悠。(網上圖片)
圖︰2007年參選港姐,成為最後5強嘅黃智雯。(網上截圖)
圖︰參加2012年港姐競選,最後於六強止步嘅湯洛雯。(網上截圖)
圖︰最後,係現年23歲嘅江嘉敏,後生、皮膚又好,自然無懼素顏啦!(網上圖片)
分享: