【節食3日】周麗淇為拍廣告捱餓 只飲水同湯

圖︰周麗淇日前為拍廣告,足足捱餓3日,唔食肉同澱粉質,只飲水同湯。(微博、ig圖片)

即將於8月尾步入39歲嘅周麗淇(Niki),近日因為拍美容院廣告而節食3日,期間只飲湯同水,嚴守零肉類、零澱粉質,加上佢有keep住做運動,咁先可以用最fit狀態示人!

Niki今次嘅廣告造型非常清爽,會晒膊同show小蠻腰,Niki接受媒體訪問時笑言︰「最見得人嘅身體部位都露晒㗎啦,其他唔見得人嘅,當然係畀我安全收埋啦!」但原來要keep住靚body,都要幾大犧牲!

拍攝當天整日唔食嘢 「好怕有胃腩」

拍廣告嘅前3日,Niki雖然都一日三餐,但只飲水同湯,「餓就食啲水果,零肉類同澱粉質;拍攝嗰日,我全日都冇食嘢,唔敢食,好怕有胃腩!」好彩出到嚟效果好好,其中一個白色造型,睇落仲好有希臘女神feel?!

不過女神還女神,節食3日都真係好辛苦㗎!Niki話,佢一收工就「餓鬼上身」,搵埋同事、工作人員齊齊去打邊爐「喪食」。所以話呢,「生命誠可貴」大家真係唔好亂咁節食呀!

圖︰為咗保持靚body,Niki一直都有做運動練肌肉㗎!(ig圖片)
分享: