【Eason英國腔】陳奕迅嘆下午茶被捕獲 流利英語講溫布頓網球賽

圖︰Eason日前在英國觀賞網球賽事,在享受英式下午茶時,被體育節目主持人認出,並即場以流利英語接受訪問,獲網民大讚。(fb影片截圖)

身穿西裝、配上三角折袋巾,一身英國紳士風嘅陳奕迅(Eason),日前到英國倫敦觀賞溫布頓網球錦標賽;正當佢喺露天茶座享受英式下午茶,竟然畀一位外國體育節目主持人「捕獲」,仲請佢分享對賽事嘅睇法同感受。曾經英國留學嘅Eason以其英式口音,再次贏得網民嘅掌聲!

被要求高歌一曲 Eason發揮急才獻唱

被外國媒體FOX亞洲體育頻道「捕獲」嘅Eason,受訪時心情大好;體育節目主持先以「香港國際超級巨星、歌手及演員」介紹Eason,再請他分享其對賽事的睇法。Eason以其British Accent(英式口音)受訪,指自己本來係支持著名網球選手費達拿(Roger Federer),點知費達拿畀奇雲安達臣(Kevin Anderson)擊敗,Eason唯有「倒戈」支持奇雲安達臣。

可惜奇雲安達臣於男單決賽,終輸咗畀塞爾維亞的祖高域(Novak Djokovic);雖然Eason好似捧邊個、輸邊個咁,但就大讚賽事精彩!主持人於訪問尾段更邀請Eason高歌一曲,祝賀奪得冠軍嘅祖高域;Eason起初話忽然諗唔到唱啲咩,而自己嘅作品好多都係情歌(love ballads),但最後都發揮急才,將皇后樂團名曲《We Are The Champions》改為「He is the champion of the world」,連主持人都大叫「Well Done」!

片段流出後,Eason嘅流利英文再次獲網民大讚,唔少人都話好羨慕佢可以講到咁好聽嘅British Accent呀!

分享: