【婆媳大戰】《BB來了》受歡迎 婆媳劇集電影有咩大熱?

圖︰《BB來了》的婆媳大戰令觀眾有所共鳴;其實歷年多套講述婆媳對立的劇集、電影都好受歡迎!(網上、TVB截圖)

無綫劇集《BB來了》獲觀眾追看及熱論,其中一個「貼地」故事線,是李佳芯與奶奶盧宛茵的「婆媳大戰」。其實與婆媳關係有關的劇集和電影,很多都是大熱之作,好似2005年汪明荃同胡杏兒合演嘅《我的野蠻奶奶》,打正旗號講新抱奶奶大戰;電影方面,由沈殿霞同袁詠儀嘅《橫紋刀劈扭紋柴》,1995年已經講緊奶奶同新抱鬧不和喇!

《野蠻奶奶》收視高 由古裝演到時裝

《我的野蠻奶奶》述身為清朝格格嘅汪明荃,同好有自己一套嘅新抱胡杏兒,鬧出嘅糾紛同趣事。由於劇集以古裝喜劇包裝,「婆媳大戰」比《BB來了》的氣氛興鬆得多,不過飾演仔仔同老公嘅黃宗澤,一樣要「左右做人難」,面對媽媽同太太夾攻,真係少啲幽默感都唔得㗎!

此劇當年最高收視達38點,由於人物深受觀眾歡迎,兩年後更開拍《野蠻奶奶大戰戈師奶》,由古裝演到時裝,同樣以喜劇包裝,最高收視更達到41點。

圖︰《我的野蠻奶奶》收視好,兩年後更開拍《野蠻奶奶大戰戈師奶》時裝劇。(網上截圖)

沈殿霞與袁詠儀的「婆媳大戰」

至於電影《橫紋刀劈扭紋柴》,袁詠儀同要求高嘅奶奶沈殿霞住埋同一間屋,朝見口、晚見面,一方面要扮到百般遷就,但同時又要諗計應對!而呢一個「野蠻奶奶」更施計離間袁詠儀同老公周華健嘅夫妻關係,搞到袁詠儀嬲到嗌離婚。

海外劇集方面,2011年江角真紀子同埋野際陽子主演嘅日劇《婆媳大戰》,同樣掀起熱話!劇中真紀子遇上「野蠻奶奶」,奶奶要佢做「家庭主婦」,真紀子卻堅持要做「職業婦女」;而2014年推出的韓劇《不要戀愛要結婚》,亦有講到整形醫生延宇振要同韓可露結合,因為媽媽金海淑絕不接受地方大學出身嘅媳婦,而起「婆媳之爭」。

香港漫晝家及創作人小黑,於2010年亦把容祖兒主唱的《桃色冒險》一曲,惡搞為《婆媳冒險》,講述新抱與奶奶同住一屋所起的衝突。

圖︰由江角真紀子及野際陽子主演的日劇《婆媳大戰》,當年亦很受歡迎。(網上截圖)
圖︰2010年,小克把《桃乙色冒險》一曲的歌詞「惡搞」成《婆媳冒險》。(小克網誌)
分享: