【切胃保命】明星髮型師Jacky Ma胃癌 手術後出院約軟硬呂方相聚

圖︰明星髮型師Jacky Ma日前於網上公佈因重病入院切胃,現已出院,正在康復中。(ig圖片)

明星髮型師Jacky Ma是林海峰、葛民輝、草蜢等御用髮型師,他日前於網上透露自己因胃癌要切胃,如今已成為「成為冇胃的人」。今日(13日)早上,Jacky Ma於ig分享與軟硬、呂方等人飯聚,並發千字文,感謝生命中認識到一班好老闆、好朋友。

ig貼圖 逐一介紹席上好友

Jacky Ma於ig帖文中,逐一介紹席上的好友,藉此向他們致謝。Jacky說︰「總之我呢一世人都唔知點解認識這麼多的好老闆好朋友 好傾聊天什麼都講 見到他們好有聊不完的感覺 所以以後我哋要多啲行埋一起聊」。

佢又好樂觀咁話,「昨天醫生説我身體康復完比一般病人快,我想是因我平常剪頭髪時大多數都是站著剪的,有點兒像在扎馬打詠春拳的馬步,剪時如手勢正確入行四十年了都應該對身體有點益處的。」

冇胃都可以照食嘢

佢之後都有接受傳媒訪問,仲話而家冇胃都可以照食嘢。Jacky坦言︰「我自己好鍾意食甜嘢,胃cancer最鍾意糖,依家割咗胃,雖然冇咗胃,都照可以食嘢,都係任你食,不過由直腸直接去小腸,依家自然食量係細咗、小心咗。」

Jacky自言係工作狂,話自己隨時可以開工,不過以後會小心啲,「噴髮劑有酒精,自己唔戴口罩,我都係死喺呢行。」

圖︰Jacky日前於ig同facebook講述自己做手術切除胃部一事。(ig圖片)
圖︰Jacky是草蜢等明星的御用理髮師。(ig圖片)
分享: